ខេត្តកំពង់ធំ ៖ កម្លាំងកងរាជអាវុធហត្ថខេត្តកំពង់ធំ បានបើកប្រតិបត្តិការបង្ក្រាបរថយន្តម៉ាក់សាំយ៉ុង ១គ្រឿង ដែលលួចដឹកឈើខុសច្បាប់ចេញពីទឹកដីខេត្តព្រះវិហារ ឆ្ពោះកាន់ខេត្តកំពង់ធំនិងដកហូតបានឈើមួយចំនួនធំ
ករណីនេះនៅថ្ងៃទី១៩ ខែកុម្ភៈ ឆ្នាំ២០២៣ ។
លោកឧត្តមសេនីយ៍ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំ បានប្រាប់អ្នកព័ត៌មាន ថា «មានរថយន្តសាំយ៉ុង ១គ្រឿងដឹកឈើពេញប្រៀប ចេញពីភូមិពោធិ ឃុំពោធិ ស្រុកត្បែងមានជ័យ ខេត្តព្រះវិហារ ត្រូវបានសមត្ថកិច្ចកងរាជអាវុធហត្ថខេត្តកំពង់ធំ បង្ក្រាបបានថ្ងៃអាទិត្យទី១៩ ខែកុម្ភៈ ឆ្នាំ២០២៣ វេលាម៉ោង ១១៖០០នាទី នៅចំណុចភូមិថ្នល់បំបែក ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ»។
លោកមេបញ្ជាការកងរាជអាវុធហត្ថខេត្ត បានបញ្ជាក់ថា ប្រតិបត្តិការនេះធ្វើឡើងក្រោមបទបញ្ជាលោក សាយ វាសនា ព្រះរាជអាជ្ញារងអមសាលាដំបូងខេត្តកំពង់ធំ បញ្ជាឱ្យសមត្ថកិច្ចកងរាជអាវុធហត្ថខេត្តធ្វើការឃាត់ទុក និងបញ្ជូនទៅផ្នែករដ្ឋបាលព្រៃឈើផ្នែកស្ទោង ដើម្បីចាត់ការតាមនីតិវិធីច្បាប់។រថយន្តនោះពាក់ស្លាកលេខភ្នំពេញ 2j-0290 បើកបរដោយបុរសម្នាក់ឈ្មោះ ម៉ៅ និងស្ត្រីម្នាក់ទៀត។
ជាទូទៅបទល្មើសដឹកជញ្ជូនឈើនៅតាមដងផ្លូវក្នុងខេត្តព្រះវិហារ ឆ្លងកាត់ខេត្តកំពង់ធំតាមផ្លូវជាតិលេខ៦២ ហាក់មានសកម្មភាពផុលផុស ដោយឈ្មួញបានធ្វើការដឹកទាំងថ្ងៃ ទាំងយប់ ដឹកដោយចំហរខ្លះ និងដឹកមានការបិទបាំងខ្លះ។ កត្តាដែលឈ្មួញអាចដឹកជញ្ជូនឈើដោយរលូនបែបនេះ គេសង្ស័យមានការត្រូវរ៉ូវជាមួយសមត្ថកិច្ចតាមដងផ្លូវអស់ហើយ ជាពិសេសនៅតាមដងផ្លូវជាតិលេខ៦២ មានស្នាក់ការត្រួតពិនិត្យជាហូរហែរជាច្រើនផងដែរ៕
