សម្តេចតេជោ ហ៊ុន សែន ប្រកាសថា ក្នុងករណីដែល លោកនាយឧត្តមសេនីយ៍ ហ៊ុន ម៉ាណែត ចេញមកធ្វើនយោបាយលោកឧត្តមសេនីយ៍ ម៉ៅ សុផាន់ ជាមេបញ្ជាការកងទ័ពជើងគោក !

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសថា លោកឧត្តមសេនីយ៍ឯក ម៉ៅ សុផាន់ មេបញ្ជាការកងពលតូចលេខ៧០ និងមេបញ្ជាការរងកងទ័ពជើងគោក នឹងកាន់តំណែងជាមេបញ្ជាការកងទ័ពជើងគោក នៅពេលណាដែល លោកបណ្ឌិត ហ៊ុន ម៉ាណែត ទៅកាន់តំណែងនយោបាយ។

សម្តេចតេជោ ហ៊ុន សែន បានប្រកាសបែបនេះ ក្នុងឱកាសដែលសម្តេច អញ្ជើញជាអធិបតីប្រគល់សញ្ញាបត្រ​ជូននិស្សិតវិទ្យាស្ថាន វ៉ាន់ដា ជិត៥ពាន់នាក់ នៅព្រឹកថ្ងៃទី២២ ខែមីនា ឆ្នាំ២០២៣។

សម្តេចបានបញ្ជាក់ថា៖ «ខ្ញុំសូមបញ្ជាក់ទុកឱ្យហើយទេ ក្នុងករណីដែល ហ៊ុន ម៉ាណែត ចេញមកធ្វើនយោបាយ អ្នកដែលឡើងកាន់ជើងគោក គឺអនុមេបញ្ជាការជើងគោកបច្ចុប្បន្ន និងជាមេបញ្ជាការ ម៉ៅ សុផាន់ មិនមែន ហ៊ុន​ ម៉ានិតទេ សូមបញ្ជាក់ទុកជូនឱ្យហើយ កុំឱ្យប៉ាន់ស្មានតែផ្តាស់ ហើយត្រូវជឿជាក់នៅក្នុងកងទ័ព»។

សម្តេចតេជោ ហ៊ុន សែន បានអះអាងថា សម្តេចមានសិទ្ធិចាត់ចែងបែបនេះ ដោយពិភាក្សាជាមួយអគ្គបញ្ជាការកងយោធពលខេមរភូមិន្ទ និងរដ្ឋមន្ត្រីក្រសួងការពារជាតិ។

ការប្រកាសរបស់ សម្តេចតេជោ បែបនេះ បានធ្វើឡើងបន្ទាប់ពីមានការអត្ថាធិប្បាយពាក់ព័ន្ធនឹងការតែងតាំង លោក ហ៊ុន ម៉ានិត ជាមេបញ្ជាការរងកងទ័ពជើងគោក បន្ថែមលើមុខងារបច្ចុប្បន្ន៕