វិមានក្រឹមឡាំងសម្តែងការសោកស្តាយចំពោះប្រទេសអាទ្បឺម៉ង់ដែលសម្រេចចិត្តបង្កើនជំនួយយោធាដល់អ៊ុយក្រែន!
អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ប្រទេសអាល្លឺម៉ង់កំពុងចូលរួមក្នុងជម្លោះអ៊ុយក្រែនកាន់តែជ្រៅឡើងៗហើយ ក្រោយប្រទេសនេះប្រកាសបន្ថែមជំនួយយោធាដល់អ៊ុយក្រែន។
នេះជាខ្លឹមសារដែលលោកបានធ្វើអត្ថាធិប្បាយលើរបាយការណ៍ Spiegel ដែលនិយាយថាទីក្រុងប៊ែកឡាំងគ្រោងនឹងបង្កើនការចំណាយលើជំនួយយោធាដល់អ៊ុយក្រែនពី ៣ ពាន់លានអឺរ៉ូដល់ជាង ១៥ពាន់លានអឺរ៉ូក្នុងរយៈពេលប៉ុន្មានឆ្នាំខាងមុខ។
នៅពេលត្រូវបានសួរថា តើការសម្រេចចិត្តបែបនេះអាចប៉ះពាល់ដល់ទំនាក់ទំនងរវាងរុស្ស៊ី និងអាឡឺម៉ង់ដោយរបៀបណានោះ លោក Peskov បាននិយាយថាទំនាក់ទំនងទ្វេភាគីនាពេលនេះ មិនជាសូវល្អនោះទេ។
លោក Peskov បានគូសបញ្ជាក់យ៉ាងដូច្នេះថា អាល្លឺម៉ង់កំពុងចូលរួមយ៉ាងសកម្ម ដោយបំពាក់អាវុធឱ្យអ៊ុយក្រែន រហូតជន់លិចអ៊ុយក្រែនដោយអាវុធតែម្តង។លោកបន្ថែមថា ទាំងដោយផ្ទាល់ និងដោយប្រយោល អាល្លឺម៉ង់បាននិងកំពុងចូលរួមក្នុងជម្លោះនេះកាន់តែខ្លាំងឡើង។ ដូច្នេះសកម្មភាព និងការសម្រេចចិត្តស្រដៀងគ្នានឹងមិននាំទៅរកអ្វីល្អនោះទេនាពេលខាងមុខ។
យោងតាម Der Spiegel ទីក្រុងប៊ែកឡាំងបានចំណាយប្រាក់ចំនួន ២.២ ពាន់លានអឺរ៉ូលើការផ្គត់ផ្គង់សព្វាវុធដល់ប្រទេសអ៊ុយក្រែន ហើយថែមទាំងប្រើប្រាស់ប្រាក់នេះដើម្បីជំនួសប្រព័ន្ធដែលត្រូវបានផ្ទេរពី Bundeswehr ផងដែរ។ នៅដើមឆ្នាំនេះ ផលបូកត្រូវបានគេរំពឹងថានឹងកើនឡើងទ្វេដង រហូតដល់ជាង ៥.៤ ពាន់លានអឺរ៉ូឯណោះ។
ជាមួយគ្នានេះ ទស្សនាវដ្តីព័ត៌មានអាឡឺម៉ង់បានសរសេរថា មានគម្រោងបែងចែកប្រាក់ចំនួន ៨.៨ពាន់លានអឺរ៉ូផ្សេងទៀត ខណការប្តេជ្ញាចិត្តផ្តល់ ដែលមានតែ ១ ពាន់លានអឺរ៉ូប៉ុណ្ណោះដែលត្រូវបានគេកំណត់មកទល់ពេលនេះ។
ទស្សនាវដ្ដីបានសរសេរថា ជំនួយដល់ក្រុងកៀវនឹងត្រូវបានបង្កើនដល់ជាង ១៥ពាន់លានអឺរ៉ូ ជារួមនាពេលខាងមុខ៕
