ចិនចង់ឱ្យយកអ្នកវាយប្រហារ Nord Stream មកកាត់ទោសដើម្បីរកយុត្តិធម៌ឲ្យរុស្សុី!
ទីក្រុងប៉េកាំងបានចោទប្រកាន់ទីក្រុងវ៉ាស៊ីនតោនអំពី “ស្តង់ដារពីរ” ជុំវិញជំហរលើការស៊ើបអង្កេតការបំផ្លិចបំផ្លាញនៃបំពង់បង្ហូរប្រេង Nord Stream2។
ក្រសួងការបរទេសចិនបាននិយាយថា អ្នកបំផ្លិចបំផ្លាញបំពង់បង្ហូរ Nord Stream2 ត្រូវតែប្រឈមមុខនឹងការផ្តន្ទាទោស ហើយក៏បានថ្កោលទោសអាមេរិកក្នុងការបរាជ័យលើការគាំទ្រការស៊ើបអង្កេតដែលដឹកនាំដោយអង្គការសហប្រជាជាតិលើឧប្បត្តិហេតុនេះ។
ទន្ទឹមនោះដំណោះស្រាយដែលឧបត្ថម្ភដោយរុស្ស៊ីសម្រាប់ការស៊ើបអង្កេតអន្តរជាតិមួយមិនបានឆ្លងកាត់ការបោះឆ្នោតនៅក្រុមប្រឹក្សាសន្តិសុខអង្គការសហប្រជាជាតិកាលពីដើមសប្តាហ៍នេះទេ។
ថ្លែងនៅក្នុងសន្និសីទសារព័ត៌មានកាលពីថ្ងៃអង្គារ អ្នកនាំពាក្យក្រសួងការបរទេសចិន លោកស្រី ម៉ៅ នីង បានអះអាងថា ទីក្រុងវ៉ាស៊ីនតោន ចង់អនុវត្តនូវអ្វីដែលហៅថា ការស៊ើបអង្កេត នៃប្រទេសកំពុងអភិវឌ្ឍន៍ ប៉ុន្តែនៅតែមានការសម្ងាត់ចំពោះឧប្បត្តិហេតុនេះ។ អ្នកការទូតរូបនេះបានលើកទ្បើងថាអាកប្បកិរិយារបស់សហរដ្ឋអាមេរិកគឺជាឧទាហរណ៍នៃ ស្តង់ដារពីរយ៉ាងជាក់ស្តែង។លោកស្រីក៏ បានស្នើថាមន្ត្រីនៅក្នុងទីក្រុងវ៉ាស៊ីនតោន ប្រហែលជាខ្លាច អ្វីមួយបានជាមិនគាំទ្រការស៊ើបអង្កេតលើបញ្ហានោះ។
លោកស្រី Mao បានបន្ថែមថា ប្រទេសចិនសង្ឃឹមថា ជនល្មើសនឹងត្រូវបាន នាំយកមកកាត់ទោស ឱ្យបានឆាប់តាមដែលអាចធ្វើទៅបានដើម្បីរកភាពយុត្តិធម៌ពិតប្រាកដ។
ប្រទេសចិន រុស្ស៊ី និងប្រេស៊ីលបានគាំទ្រសេចក្តីព្រាងដំណោះស្រាយសម្រាប់ការស៊ើបអង្កេត Nord Stream អន្តរជាតិនៅក្នុងការបោះឆ្នោតក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃចន្ទ បើទោះបីជាសមាជិកចំនួន ១២ នាក់ផ្សេងទៀតបានបដិសេធក៏ដោយ។
ប្រសិនបើត្រូវបានអនុម័ត ដំណោះស្រាយនឹងស្នើសុំឱ្យអគ្គលេខាធិការបង្កើតគណៈកម្មការមួយដើម្បីធ្វើការស៊ើបអង្កេតអន្តរជាតិដ៏ទូលំទូលាយ តម្លាភាព និងមិនលំអៀង នៃឧប្បត្តិហេតុដែលបានកើតឡើងនៅក្នុងខែកញ្ញាឆ្នាំមុនលើបំពង់បង្ហូរឧស្មន័។
សហរដ្ឋអាមេរិកបានអះអាងថាសំណើខាងលើនេះមានបំណងធ្វើឱ្យខូចដល់ការស៊ើបអង្កេតថ្នាក់ជាតិដែលត្រូវបានគ្រប់គ្រងដោយប្រទេសអាល្លឺម៉ង់ ដាណឺម៉ាក និងស៊ុយអែតនាពេលកន្លងមក។ អាឡឺម៉ង់គឺជាអ្នកទទួលឧស្ម័នធម្មជាតិរបស់រុស្ស៊ីដែលត្រូវបានបូមតាមបំពង់បង្ហូរប្រេងដែលត្រូវបានបំផ្លាញនោះ។ ប្រទេសដាណឺម៉ាក និងស៊ុយអែតកំពុងធ្វើការស៊ើបអង្កេត ខណៈដែលការផ្ទុះដែលបំបែកទំនាក់ទំនងថាមពលបានកើតឡើងនៅក្នុងដែនទឹករបស់ពួកគេ។
តំណាងរងរបស់ចិនប្រចាំអង្គការសហប្រជាជាតិ លោក Geng Shuang បានអះអាងថា គ្មានឧបសគ្គក្នុងការបើកការស៊ើបអង្កេតអន្តរជាតិស្របជាមួយប្រទេសជាតិនោះទេ។
លោក Geng ក៏បានកត់សម្គាល់ដែរថា ប្រទេសទាំងបីនៃប្រទេសអឺរ៉ុបមានពេលប្រាំមួយខែរួចហើយដើម្បីធ្វើការស៊ើបអង្កេតរបស់ពួកគេ តែមិនមានលទ្ធផលជាក់លាក់។ គណៈប្រតិភូចិនបាននិយាយនៅក្នុងសេចក្តីថ្លែងការណ៍មួយថា រដ្ឋាភិបាលក្រុងប៉េកាំងរំពឹងថាពួកគេ បង្កើនអារម្មណ៍នៃភាពបន្ទាន់របស់ពួកគេ រាយការណ៍ពីវឌ្ឍនភាពនៃការស៊ើបអង្កេតទៅក្រុមប្រឹក្សាសន្តិសុខឱ្យបានទាន់ពេលវេលា និងទៀងទាត់ ហើយស្វែងរក និងប្រកាសលទ្ធផលនៃការស៊ើបអង្កេតឱ្យបានឆាប់តាមដែលអាចធ្វើទៅបាន។
អ្នកកាសែតស៊ើបអង្កេតជើងចាស់លោក Seymour Hersh បានអះអាងកាលពីខែមុនថា ការវាយប្រហារលើបំពង់បង្ហូរ Nord Stream ត្រូវបានបញ្ជាដោយប្រធានាធិបតីអាមេរិក Joe Biden ហើយត្រូវបានធ្វើឡើងរួមគ្នាដោយអាមេរិក និងន័រវែស។ ប៉ុន្តែ ប្រទេសទាំងពីរបានបដិសេធការចោទប្រកាន់ទាំងនោះ។
ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីសប្តាហ៍មុនថា លោក យល់ព្រមទាំងស្រុង ជាមួយនឹងការសន្និដ្ឋានរបស់ Hersh៕
