យ៉ាងហោចណាស់មនុស្ស ៧៨ នាក់បានស្លាប់ និងរាប់សិបនាក់ទៀតរងរបួសនៅក្នុងការរត់ជាន់គ្នានៅក្នុងរដ្ឋធានីនៃប្រទេសយេម៉ែន នេះបើយោងតាមមន្ត្រី Houthi និងប្រព័ន្ធផ្សព្វផ្សាយ។
អ្នកនាំពាក្យក្រសួងមហាផ្ទៃដែលគ្រប់គ្រងដោយក្រុមហ៊ូធីបាននិយាយនៅក្នុងសេចក្តីថ្លែងការណ៍មួយថា ការរត់ជាន់គ្នាបានកើតឡើងកាលពីល្ងាចថ្ងៃពុធ ខណៈដែលមនុស្សរាប់រយនាក់បានប្រមូលផ្តុំគ្នាចូលទៅក្នុងសាលារៀនមួយក្នុងទីក្រុង Sanaa ក្នុងក្តីសង្ឃឹមថានឹងទទួលបានអំណោយសប្បុរសធម៌ដែលត្រូវបានប្រគល់ដោយឈ្មួញដើម្បីប្រារព្ធថ្ងៃចុងក្រោយនៃបុណ្យរ៉ាម៉ាដាន។
សាក្សីក្នុងហេតុការណ៍ បានប្រាប់ទីភ្នាក់ងារសារព័ត៌មាន Associated Press ថា ក្រុមប្រដាប់អាវុធ Houthi បានបាញ់ទៅលើអាកាស ក្នុងការប៉ុនប៉ងគ្រប់គ្រងហ្វូងមនុស្ស ដោយជាក់ស្តែងបានប៉ះខ្សែភ្លើង និងបង្កឱ្យមានការភ័យស្លន់ស្លោក្នុងចំណោមអ្នករង់ចាំ។
អ្នកនាំពាក្យក្រសួងមហាផ្ទៃដែលគ្រប់គ្រងដោយក្រុម Houthi លោក Brig Abdel-Khaleq al-Aghri បានពណ៌នាឧបទ្ទវហេតុនេះថាជា “សោកនាដកម្ម” ដោយបន្ទោស “ការចែកចាយដោយចៃដន្យ” នៃមូលនិធិដោយគ្មានការសម្របសម្រួលជាមួយអាជ្ញាធរមូលដ្ឋាន។
ទោះជាយ៉ាងណា ឈ្មួញពីរនាក់ដែលរៀបចំព្រឹត្តិការណ៍នេះត្រូវបានឃាត់ខ្លួន ហើយការស៊ើបអង្កេតកំពុងដំណើរការ។
ដោយឡែក ក្រុម Houthis បានប្រកាសថាពួកគេនឹងផ្តល់សំណងចំនួន 2,000 ដុល្លារដល់គ្រួសារនីមួយៗដែលបានបាត់បង់សាច់ញាតិខណៈពេលដែលអ្នករងរបួសនឹងទទួលបានប្រហែល 400 ដុល្លារ។
គួរបញ្ជាក់ថា មនុស្សជាង 21 លាននាក់នៅក្នុងប្រទេសយេម៉ែន ឬពីរភាគបីនៃចំនួនប្រជាជនរបស់ប្រទេសនេះ កំពុងត្រូវការជំនួយ និងការការពារ នេះបើយោងតាមការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌៕
