ប៉េរូ បញ្ជូនកងកម្លាំងរាបរយនាក់ទៅកាន់ព្រំដែនប្រទេសឈីលី ខណៈដែលមនុស្សរាប់រយនាក់កំពុងជាប់គាំង!
អាជ្ញាធររបស់ប្រទេសប៉េរូបាននិយាយថា រដ្ឋាភិបាលប៉េរូកំពុងបញ្ជូនទាហាន និងប៉ូលិសប្រមាណ ៧០០នាក់ទៅកាន់ព្រំដែនរបស់ខ្លួនជាមួយប្រទេសឈីលី ខណៈដែលជនចំណាកស្រុកគ្មានឯកសាររាប់រយនាក់ដែលកំពុងស្វែងរកចូលប្រទេសប៉េរូកំពុងជាប់គាំងនៅព្រំដែន។
សេចក្តីប្រកាសកាលពីថ្ងៃសុក្របានកើតឡើងនៅពេលដែលមនុស្សរាប់រយនាក់ ដែលភាគច្រើនបាននិយាយថាពួកគេកំពុងស្វែងរកចូលទៅកាន់ប្រទេសប៉េរូ ដើម្បីបន្តឆ្ពោះទៅប្រទេសកំណើតរបស់ពួកគេគឺវ៉េណេស៊ុយអេឡា នៅតែស្ថិតក្នុងជំរំនៅខាងព្រំដែនប្រទេសឈីលី។
ជនចំណាកស្រុកផ្សេងទៀតបាននិយាយថា ពួកគេមានគម្រោងធ្វើដំណើរទៅភាគខាងជើងទៅកាន់ព្រំដែនសហរដ្ឋអាមេរិក ហើយក្រុមសិទ្ធិមនុស្សបានរាយការណ៍ថាជនជាតិហៃទី និងជនបរទេសផ្សេងទៀតស្ថិតក្នុងចំណោមអ្នកដែលជាប់គាំងនោះផងដែរ។
ប្រធានាធិបតីប៉េរូ លោក Dina Boluarte បានប្រកាសភាពអាសន្ននៅក្នុងទីក្រុង Tacna ដែលជាទីក្រុងនៅជិតព្រំដែនជាមួយប្រទេសឈីលី កាលពីដើមសប្តាហ៍នេះ ដើម្បីឆ្លើយតបទៅនឹងលំហូរចូលមកដល់ ដោយបើកផ្លូវសម្រាប់ប្រតិបត្តិការរួមគ្នាដោយយោធា និងប៉ូលីស។
រដ្ឋមន្ត្រីមហាផ្ទៃប្រទេសប៉េរូ លោក Vicente Romero បានប្រាប់វិទ្យុក្នុងស្រុក RPP កាលពីថ្ងៃសុក្រថា មន្ត្រីប៉ូលិសប្រហែល 390 នាក់បានទៅដល់ព្រំដែនរួចហើយ ហើយទាហាន 300 នាក់ទៀតនឹងទៅដល់ទីនោះក្នុងពេលឆាប់ៗនេះពីផ្នែកផ្សេងៗនៃប្រទេស។
លោក Romero បាននិយាយថា «យើងនឹងមិនអនុញ្ញាតឱ្យមានការចូលដោយខុសច្បាប់ ឬការវាយប្រហារលើប៉ូលីសនោះទេ” ដោយនិយាយឡើងវិញនូវការអះអាងរបស់មន្ត្រីរដ្ឋាភិបាលថាអ្នកដែលនៅព្រំដែនកំពុងប្រព្រឹត្តបទឧក្រិដ្ឋ ជាមួយនឹងរូបភាពមួយចំនួនបង្ហាញពីជនចំណាកស្រុកដែលរុញមន្រ្តីល្បាតព្រំដែនប៉េរូក្នុងកិច្ចខិតខំប្រឹងប្រែងដើម្បីចូលទៅក្នុងប្រទេស»។
ក្នុងប៉ុន្មានសប្តាហ៍ថ្មីៗនេះ ប្រទេសឈីលីបានបង្កើនការរឹតបន្តឹងលើប្រជាជនដែលរស់នៅក្នុងប្រទេសនេះដោយគ្មានឯកសារស្របច្បាប់ ដែលជំរុញឱ្យមានការកើនឡើងនៃចំនួនអ្នកដែលចង់ចាកចេញ។
នៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ អង្គការលើកលែងទោសអន្តរជាតិបាននិយាយថា “យ៉ាងហោចណាស់មនុស្ស 300 នាក់ រួមទាំងគ្រួសារដែលមានកុមារ និងក្មេងជំទង់ ស្ត្រីមានផ្ទៃពោះ និងអ្នកជំងឺរ៉ាំរ៉ៃ” ត្រូវបានជាប់គាំងនៅព្រំដែន និងប្រឈមមុខនឹងស្ថានភាពកាន់តែយ៉ាប់យ៉ឺនខ្លាំង។ អ្នកដែលបានជាប់គាំងទាំងនោះបានរស់នៅក្នុងជំរុំបណ្តោះអាសន្នអស់ជាច្រើនសប្តាហ៍នៅក្នុងវាលខ្សាច់ Atacama ដែលជាកន្លែងស្ងួតបំផុតនៅលើភពផែនដី និងជាតំបន់ដែលមានថ្ងៃក្តៅខ្លាំង និងយប់ត្រជាក់ខ្លាំង ជាមួយនិងការខ្វះខាតទឹក និងសេវាមូលដ្ឋាន៕
