សម្ដេចតេជោ ហ៊ុន សែន ឲ្យអ្នកវិនិយោគដីធ្លីផ្នែកអចលនទ្រព្យបញ្ឈប់ការទិតៀនលើការកំណត់កម្ពស់សាងសង់ នៅសៀមរាប-អង្គរ និងសូមឪ្យមើលព្រៃទាំងមូល កុំមើលឈើមួយដើមៗ

(សៀមរាប) ៖ ក្នុងពិធីអញ្ជើញសម្ភោធដាក់អោយប្រើប្រាស់ផ្លូវ៣៨ខ្សែ ព្រមទាំងហេដ្ឋារចនាសម្ព័ន្ធរូបវន្តមួយចំនួនទៀតក្នុងក្រុងសៀមរាប សម្តេចតេជោនាយករដ្ឋមន្ត្រីបានថ្លែងបញ្ជាក់ថា ការអភិវឌ្ឍន៍អចលនទ្រព្យ ដោយការសាងសង់អគារខ្ពស់ៗ នៅខេត្តសៀមរាប ត្រូវគោរពតាមលក្ខខណ្ឌបច្ចេកទេស របស់អង្គការយូណេស្កូ ដោយមិនចេះតែធ្វើបំពាននោះទេ។

សម្តេចតេជោបញ្ជាក់ថា ប្រសិនបើកម្ពុជាធ្វើការសាងសង់ បំពានលក្ខខណ្ឌបច្ចេកទេស របស់អង្គការយូណេស្កូនោះ អង្គរវត្តរបស់កម្ពុជា នឹងត្រូវចេញពីបញ្ជីបេតិកភណ្ឌពិភពលោក ដែលអាចធ្វើឲ្យកម្ពុជាខាតបង់ធំធេង។

សម្តេចតេជោ ហ៊ុន សែន បានថ្លែងថា ប្រទេសជឿនលឿនមួយចំនួន នៅលើពិភពលោក ដែលសាងសង់បំពានលក្ខខណ្ឌបច្ចេកទេស របស់អង្គការយូណេស្កូ ត្រូវបានដកចេញពីបញ្ជីបេតិកភណ្ឌពិភពលោក។

សម្តេចតេជោ ហ៊ុន សែន បន្តថា រាជរដ្ឋាភិបាលកម្ពុជា បាននឹងកំពុងរៀបចំដាក់តំបន់ផ្សេងទៀត ក្នុងបញ្ជីបេតិកភណ្ឌពិភពលោក ដូច្នេះកម្ពុជាត្រូវតែគោរពលក្ខខណ្ឌរបស់អង្គការយូណេស្កូ ។

ការលើកឡើងរបស់សម្តេចតេជោ ហ៊ុន សែន សំដៅលើអ្នករកសុីអចលទ្រព្យ លោក គឹម ហ៊ាង ដែលបានលើកឡើងកាលពីពេលថ្មីៗ កន្លងទៅនេះ នៅលើទឹកដីខេត្តសៀមរាប។

សម្តេចតេជោ ហ៊ុន សែន បានលើកឡើងថា សម្តេចធ្លាប់ស្នើដល់ក្រុមហ៊ុនមួយ ដែលចង់វិនិយោគជីកស្រះដ៏ធំមួយនៅសៀមរាប ឲ្យធ្វើការកែតម្រូវភ្លាមៗ បន្ទាប់ពីមានប្រតិកម្មពីអង្គការយូណេស្កូ។

ជាមួយគ្នានេះ សម្តេចបានស្នើអោយបញ្ឈប់ការទិតៀនអាជ្ញាធរពាក់ព័ន្ធនឹងការកម្រិតកម្ពស់ ក្នុងការអភិវឌ្ឍន៍សាងសង់អគារបន្តទៀត ការអភិវឌ្ឍន៍កន្លែងផ្សេងបាន តែមិនមែននៅជិតតំបន់អង្គរនោះទេ។

សម្តេចតេជោ ហ៊ុន សែន បានលើកឡើងយ៉ាងដូច្នេះថា «ខ្ញុំសុំយកឱកាសនេះ និយាយបន្តិចជូនចំពោះអ្នកវិនិយោគដីធ្លី ផ្នែកអចលនទ្រព្យ ដែលមុននេះបានបញ្ចេញមតិ ធ្វើឲ្យមានប្រតិកម្ម ខ្ញុំគិតថាការលើកឡើងនោះគាត់ក៏ដឹងថាខុស គាត់លើកឡើងថា នៅសៀមរាបមិនអាចអភិវឌ្ឍន៍បានដោយសារ អាជ្ញាធរមិនឲ្យសាងសង់ខ្ពស់ ខ្ញុំសូមបញ្ជាក់ថា មិនអាចយកតំបន់សៀមរាប ប្រៀបធៀបទៅនឹងទីផ្សារអចលនទ្រព្យ ដូចជាខេត្តដទៃទេ បើសិនជាធ្វើដូច្នេះ គឺកម្ពុជានឹងត្រូវគេបណ្តេញ ដោយយកអង្គរវត្តរបស់យើងចេញពី បញ្ជីបេតិកភណ្ឌពិភពលោកហើយ អីចឹងសូមឲ្យអ្នកទីផ្សារអចលនទ្រព្យ សូមមើលព្រៃទាំងមូល កុំមើលឈើមួយដើមៗ»។

សម្តេចតេជោបញ្ជាក់ថា រាជរដ្ឋាភិបាលមិនអាចធ្វើឲ្យប្រាសាទអង្គរ ដែលជាបេតិកភណ្ឌរបស់ពិភពលោក បាត់បង់លក្ខខណ្ឌសម្បត្តិណាមួយ ជាសម្បត្តិបេតិកភណ្ឌពិភពលោកនោះទេ។ សម្តេចសូមឲ្យអង្គការអន្តរជាតិ ដូចជាយូណេស្កូ ក៏ដូចជាប្រទេសដៃគូ ដែលជាសហប្រធានគណៈកម្មការអន្ដរជាតិសម្របសម្រួល កិច្ចគាំពារ និងអភិវឌ្ឍន៍តំបន់ប្រវត្តិសាស្ដ្រអង្គរ (ICC) រួមមានប្រទេសជប៉ុន និងប្រទេសបារាំង ដែលគ្រោងចុះហត្ថលេខាបន្តជាមួយកម្ពុជា១០ឆ្នាំបន្ថែមទៀត កុំមានការស្ទាក់ស្ទើរ នេះជាការអះអាងរបស់សម្តេច ក្នុងនាមជានាកយករដ្ឋមន្ត្រីនៃកម្ពុជា ដើម្បីធានាថា សម្បត្តិដូនតាដែលបានខិតខំរក្សាទុកពីមុនមកត្រូវបានគោរព។

គួររំលឹកថា បន្ទាប់ពីប្រព្រឹត្តកំហុស និយាយប៉ះពាល់ដល់វប្បធម៌ជាតិ ឧកញ៉ា អ្នករកស៊ីក្នុងវិស័យអចលនទ្រព្យ កាលពីថ្ងៃទី១៧ ខែកុម្ភៈ ឆ្នាំ២០២២កន្លងទៅ បានចេញលិខិតសុំទោសជាសាធារណៈដល់ប្រជាជនកម្ពុជា អាជ្ញាធរមានសមត្ថកិច្ចគ្រប់លំដាប់ថ្នាក់ ពិសេសដល់ថ្នាក់ដឹកនាំប្រទេស ចំពោះកំហុសដ៏ធំនេះ៕