រុស្សុីចោទថា អ៊ុយក្រែនបង្កើនការវាយប្រហារភេរវកម្មដោយយន្តហោះគ្មានមនុស្សបើកលើឧបទ្វីបគ្រីមៀ! 

ក្រសួងការពារជាតិនៅទីក្រុងមូស្គូបានឲ្យដឹងថា កងកម្លាំងរុស្ស៊ីបានស្ទាក់ចាប់ការវាយប្រហាររបស់អ៊ុយក្រែននៅលើឧបទ្វីបគ្រីមៀ ដោយប្រើយន្តហោះគ្មានមនុស្សបើកចំនួន ២៥ គ្រឿង ។ ប៉ុន្តែក្រសួងបានបញ្ជាក់ថា ការវាយឆ្មក់នេះមិនបណ្តាលឱ្យមានអ្នកស្លាប់ ឬការខូចខាតអ្វីនោះទេ។

នៅក្នុងសេចក្តីថ្លែងការណ៍មួយកាលពីព្រឹកថ្ងៃអាទិត្យ ក្រសួងការពារជាតិរុស្ស៊ីបានឲ្យដឹងដែរថា ទីក្រុងមូស្គូបានបំផ្លាញ ការប៉ុនប៉ងរបស់របបក្រុងគៀវ ដើម្បីអនុវត្តការវាយប្រហារភេរវករជាមួយនឹងយន្តហោះគ្មានមនុស្សបើកប្រភេទយន្តហោះចំនួន ២៥ គ្រឿង លើគ្រឿងបរិក្ខារនានានៅគ្រីមៀ។

ស្ថាបន័នេះអះអាងថា យន្តហោះគ្មានមនុស្សបើកអ៊ុយក្រែនចំនួន ១៦ គ្រឿងត្រូវបានបាញ់ទម្លាក់ដោយប្រព័ន្ធការពារដែនអាកាសរបស់រុស្ស៊ី ខណៈដែល ៩ គ្រឿងផ្សេងទៀតត្រូវបានបង្ក្រាបដោយសង្គ្រាមអេឡិចត្រូនិច ហើយបានធ្លាក់ក្នុងទឹកនៅជិត Cape Tarkhankut ភាគខាងលិចនៃឧបទ្វីបគ្រីមៀ។

ឧបទ្វីប Crimea ដែលបម្រើជាមូលដ្ឋានសំខាន់សម្រាប់កងនាវាចរសមុទ្រខ្មៅរបស់រុស្ស៊ី បានស្ថិតនៅក្រោមការវាយប្រហារយ៉ាងសន្ធាប់ដោយមីស៊ីល និងយន្តហោះគ្មានមនុស្សបើករបស់អ៊ុយក្រែនក្នុងរយៈពេលប៉ុន្មានខែថ្មីៗនេះ។ កាលពីដើមសប្តាហ៍មុន ក្រសួងការពារជាតិរុស្ស៊ីបានរាយការណ៍ពីការវាយឆ្មក់ស្រដៀងគ្នានេះពាក់ព័ន្ធនឹងយន្តហោះគ្មានមនុស្សបើកចំនួន ១៧ គ្រឿង ដោយអះអាងថា ពួកវាទាំងអស់ត្រូវបានទម្លាក់។

ទោះបីជាយ៉ាងណាក៏ដោយ លោក Sergey Aksyonov មេដឹកនាំក្នុងតំបន់បាននិយាយថា ការវាយប្រហារនេះបានសំដៅឃ្លាំងស្តុករំសេវក្នុងស្រុកតែម្តង។

កាលពីដើមខែនេះ ការវាយឆ្មក់របស់ UAV របស់អ៊ុយក្រែននៅលើស្ពាន Crimean បានធ្វើឱ្យខូចខាតផ្នែកមួយនៃផ្លូវថ្នល់ និងបានឆក់យកអាយុជីវិតរបស់ប្តីប្រពន្ធជនជាតិរុស្សីម្នាក់ ខណៈដែលបានធ្វើឱ្យកូនស្រីជំទង់របស់ពួកគេរងរបួស។ ទីក្រុងមូស្គូបានឆ្លើយតបដោយការបាញ់កាំជ្រួចកាន់តែខ្លាំងទៅលើមូលដ្ឋានយោធារបស់អ៊ុយក្រែននៅក្នុងទីក្រុងកំពង់ផែ Odessa ។

នៅក្នុងបទសម្ភាសន៍ជាមួយទូរទស្សន៍ CNN កាលពីថ្ងៃចន្ទសប្តាហ៏មុន រដ្ឋមន្ត្រីការពារជាតិអ៊ុយក្រែន លោក Aleksey Reznikov បានប្តេជ្ញាថានឹងវាយប្រហារបន្ថែមទៀតលើតំបន់គ្រីមៀ ដោយពណ៌នាអំពីការវាយប្រហារនេះថាជា យុទ្ធសាស្ត្រធម្មតាដើម្បីបំផ្លាញខ្សែភស្តុភារនៃសត្រូវ ដើម្បីបញ្ឈប់ជម្រើសដើម្បីទទួលបានគ្រាប់រំសេវបន្ថែមទៀត រួមទាំងទទួលបានឥន្ធនៈ និងអាហារច្រើនទៀត៕