លោក ពូទីន បញ្ជាឲ្យបើកការស៊ើបអង្កេតយ៉ាងហ្មត់ចត់ ក្នុងឧបទ្ទវហេតុធ្លាក់យន្តហោះសម្លាប់លោក Prigozhin!

ប្រធានាធិបតីរុស្ស៊ី លោក វ្ល៉ាឌីមៀ ពូទីន នៅថ្ងៃព្រហស្បតិ៍នេះ បានសម្តែងការចូលរួមរំលែកទុក្ខដល់ក្រុមគ្រួសារនៃអ្នកដែលបានបាត់បង់ជីវិតក្នុងឧបទ្ទវហេតុធ្លាក់យន្តហោះឯកជនក្នុងតំបន់ Tver ដោយនិយាយថាឧបទ្ទវហេតុនេះនឹងត្រូវស៊ើបអង្កេតឱ្យបានហ្មត់ចត់បំផុត។

កាលពីល្ងាចថ្ងៃពុធ ទីភ្នាក់ងារដឹកជញ្ជូនផ្លូវអាកាសសហព័ន្ធរបស់រុស្ស៊ី បាននិយាយថា យន្តហោះ Embraer-135 បានធ្លាក់នៅក្នុងតំបន់ Tver របស់ប្រទេសរុស្ស៊ី ខណៈដែលកំពុងធ្វើដំណើរពីទីក្រុងមូស្គូ ទៅកាន់ទីក្រុង St. Petersburg ដោយបានសម្លាប់អ្នកដំណើរទាំងអស់នៅលើយន្តហោះ រួមទាំងប្រធាន Wagner លោក Yevgeny Prigozhin ផងដែរ។

ក្រោយមកទីភ្នាក់ងារនេះបានចេញផ្សាយបញ្ជីឈ្មោះបុគ្គលនៅលើយន្តហោះ ដែលរួមមាន Prigozhin សហស្ថាបនិក Wagner លោក Dmitry Utkin និងបុគ្គលិក Wagner ផ្សេងទៀត។

ទាក់ទងនឹងការស្លាប់របស់ លោក Prigozhin ក្នុងឧបទ្ទវហេតុធ្លាក់នោះ លោក Putin បាននិយាយថា “គាត់បានស្គាល់លោក Prigozhin តាំងពីដើមទសវត្សរ៍ឆ្នាំ 1990 មកម្ល៉េះ។ គាត់​ជា​បុរស​ដែល​មាន​វាសនា​លំបាក ប៉ុន្តែ​គាត់​បាន​សម្រេច​លទ្ធផល​ដែល​គាត់ចង់​បាន។

ក្នុងជំនួបជាមួយលោក Denis Pushilin ប្រមុខស្តីទីនៃសាធារណរដ្ឋប្រជាមានិត Donetsk ដែលជាតំបន់មួយនៃអ៊ុយក្រែនដែលបច្ចុប្បន្នស្ថិតនៅក្រោមការគ្រប់គ្រងរបស់រុស្ស៊ី លោក Putin បាននិយាយថា “Prigozhin បានធ្វើការយ៉ាងសកម្មមិនត្រឹមតែនៅក្នុងប្រទេសរបស់យើងប៉ុណ្ណោះទេ ប៉ុន្តែថែមទាំងនៅក្រៅប្រទេសផងដែរ។ ហើយគាត់បានធ្វើការដោយជោគជ័យ។

ទោះជាយ៉ាងណា ការស្លាប់មេដឹកនាំ Wagner Group ត្រូវបានពិភពលោកចង្អុលមកលើលោក ពូទីន ដោយថាជាអ្នកនៅពីក្រោយនៃឧបទ្ទវហេតុដ៏ភ្ញាក់ផ្អើលមួយនេះ។

ទន្ទឹមនឹងនេះ រដ្ឋមន្ត្រីការបរទេសរុស្ស៊ីលោក Lavrov បានប្រាប់ប្រព័ន្ធផ្សព្វផ្សាយរុស្ស៊ីនៅអាហ្វ្រិកខាងត្បូងបន្ទាប់ពីកិច្ចប្រជុំកំពូល BRICS ថា “គេគួរតែផ្តោតលើការពិត មិនមែនលើសេចក្តីថ្លែងការណ៍របស់ប្រព័ន្ធផ្សព្វផ្សាយលោកខាងលិចទេ” ទាក់ទងនឹងការធ្លាក់យន្តហោះរបស់ លោក Prigozhin ៕