ចិនព្រមានថា សហរដ្ឋអាមេរិកកំពុងព្យាយាមបង្កើនហានិភ័យនៃសោកនាដកម្មដូចអ៊ុយក្រែននៅឥណ្ឌូប៉ាស៊ីហ្វិក!

រដ្ឋមន្ត្រីការបរទេសចិន លោក Wang Yi បានលើកឡើងថា សកម្មភាពរបស់សហរដ្ឋអាមេរិកនៅក្នុងឥណ្ឌូប៉ាស៊ីហ្វិក បានបង្កើនហានិភ័យនៃអ្វីមួយដូចជាវិបត្តិអ៊ុយក្រែន ដែលកំពុងកើតឡើងនៅក្នុងតំបន់។

លោក Wang បាននិយាយនៅក្នុងការសន្ទនាតាមទូរស័ព្ទជាមួយសមភាគីវៀតណាមលោក Bui Thanh Son កាលពីថ្ងៃព្រហស្បតិ៍ថា “សហរដ្ឋអាមេរិកព្យាយាមបង្កើតភាពតានតឹងក្នុងតំបន់ និងញុះញង់ឱ្យមានការប្រឆាំង និងការប្រឈមមុខដាក់គ្នាដោយការជំរុញទៅមុខជាមួយនឹង “យុទ្ធសាស្ត្រឥណ្ឌូប៉ាស៊ីហ្វិក” ។

លោកបានបន្តថា “ចំណាត់ការរបស់ទីក្រុងវ៉ាស៊ីនតោន នឹងធ្វើឱ្យខូចខាតយ៉ាងធ្ងន់ធ្ងរដល់សន្តិភាព និងការអភិវឌ្ឍន៍ដែលបានទទួលយ៉ាងលំបាកនៅក្នុងតំបន់ និងបំផ្លាញយ៉ាងធ្ងន់ធ្ងរនូវស្ថាបត្យកម្មកិច្ចសហប្រតិបត្តិការក្នុងតំបន់ដែលផ្តោតលើអាស៊ាន” ។ ជាក់ស្ដែង វិបត្តិអ៊ុយក្រែនក៏បានបង្ហាញពីភាពលំបាកនៃនយោបាយប្លុកផងដែរ ដោយធ្វើឱ្យ “បណ្តាប្រទេសអាស៊ីយល់ថា ការរក្សាសន្តិភាព និងស្ថិរភាពគឺមានតម្លៃ ហើយការបណ្ដោយខ្លួនឱ្យមានការប្រឈមមុខដាក់គ្នាក្នុងប្លុកនឹងនាំឱ្យមានហានិភ័យគ្មានទីបញ្ចប់” ។

លោកបានបន្ថែមថា ប្រទេសចិននឹងដើរតួនាទីយ៉ាងសកម្មក្នុងការធានាសន្តិភាព និងស្ថិរភាពក្នុងតំបន់ និងទប់ទល់នឹងផលប៉ះពាល់នៃវិបត្តិអ៊ុយក្រែន។

ក្នុងនោះដែរ វៀតណាមក៏ចង់ឱ្យភាគីទាំងពីរ រុស្ស៊ី  និងអ៊ុយក្រែន “គោរពតាមធម្មនុញ្ញអង្គការសហប្រជាជាតិ និងច្បាប់អន្តរជាតិ ហើយស្វែងរកដំណោះស្រាយរយៈពេលវែងចំពោះភាពខុសគ្នា ដោយផ្អែកលើការគោរពសិទ្ធិ និងផលប្រយោជន៍ស្របច្បាប់របស់ភាគីទាំងអស់”៕