យន្តហោះចម្បាំងអ៊ីស្រាអែលទម្លាក់គ្រាប់បែកនៅហ្គាហ្សាស្ទ្រីបជាច្រើនគ្រាប់ដើម្បីជាការឆ្លើយតប!
យោងតាមរបាយការណ៍បានឲ្យដឹងថា យន្តហោះចម្បាំងរបស់អ៊ីស្រាអែល បានវាយប្រហារទីតាំងមួយនៅតំបន់ហ្គាហ្សាស្ទ្រីប កាលពីព្រឹកថ្ងៃអង្គារ ដែលជាទីតាំងមានទំនាក់ទំនងជាមួយកងពលតូច Ezzedine al-Qassam យោធានៃអង្គការហាម៉ាសប៉ាឡេស្ទីន។
យោងតាមអ្នកឆ្លើយឆ្លងព័ត៌មានរបស់ទីភ្នាក់ងារ Anadolu បានឱ្យដឹងថា ការវាយប្រហារជាច្រើនដោយយន្តហោះចម្បាំងអ៊ីស្រាអែលបានកំណត់គោលដៅមួយនៅភាគខាងលិចទីក្រុង Khan Yunis នៅភាគខាងត្បូង Gaza Strip ។
យ៉ាងណាមិញ គ្មានអ្នកស្លាប់ ឬរបួសត្រូវបានរាយការណ៍ដោយក្រសួងសុខាភិបាលប៉ាឡេស្ទីនទេ។
គួរជម្រាបថា មុននេះ កងកម្លាំងការពារអ៊ីស្រាអែល (IDF) បានប្រកាសនៅលើ Twitter ថា គ្រាប់រ៉ុក្កែតមួយគ្រាប់របស់សត្រូវ ដែលបានបាញ់ចេញពីតំបន់ហ្គាហ្សា ត្រូវបានស្ទាក់ចាប់ដោយប្រព័ន្ធការពារដែនអាកាស Iron Dome របស់អ៊ីស្រាអែល។
អ៊ីស្រាអែល បាននិយាយថា ការវាយប្រហារត្រូវបានធ្វើឡើងជាការឆ្លើយតបទៅនឹងការបាញ់ចេញពីតំបន់ហ្គាហ្សាចូលទៅក្នុងប្រទេសអ៊ីស្រាអែលដោយបន្ថែមថា “យើងគ្រាន់តែបានកំណត់គោលដៅទីតាំងផលិតអាវុធរបស់ក្រុមហាម៉ាសនៅហ្គាហ្សា” ។
ទន្ទឹមនឹងនោះ នាយករដ្ឋមន្ត្រីអ៊ីស្រាអែល Naftali Bennett បាននិយាយថា ក្រុមហាម៉ាសគឺជាអ្នកទទួលខុសត្រូវចំពោះការកើនឡើងនៃភាពតានតឹងនៅក្នុងប្រទេសអ៊ីស្រាអែល និងប៉ាឡេស្ទីន។
គួរបញ្ជាក់ថា ភាពតានតឹងបាន និងកំពុងកើនឡើងខ្ពស់នៅទូទាំងទឹកដីប៉ាឡេស្ទីនចាប់តាំងពីដើមខែមេសាមកចំពេលមានយុទ្ធនាការចាប់ខ្លួនអ៊ីស្រាអែលម្តងហើយម្តងទៀតនៅតំបន់ West Bank៕
