សមិទ្ធផលមួយចំនួននៅក្នុងក្រុងកំពង់ចាម គ្រោងដាក់សម្ពោធឲ្យប្រើប្រាស់ជាផ្លូវការនាពេលឆាប់ៗខាងមុខ

នៅព្រឹកថ្ងៃទី២១ ខែមេសា ឆ្នាំ២០២២ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ដោយមានការនិមន្ត និងចូលរួមពីតំណាងក្រសួងធម្មការ និងសាសនា ក្រុមការងារពិធីការឯកឧត្តមបណ្ឌិត ហ៊ុន ម៉ាណែត ,ព្រះសាកលវិទ្យាធិការ រួមនឹងថ្នាក់ដឹកនាំនៃសាកលវិទ្យាល័យសម្ដេចអគ្គមហាសេនាបតីតេជោ ហ៊ុន សែន ព្រមទាំងក្រុមការងារខេត្ត អាជ្ញាធរមូលដ្ឋាន និងមន្ត្រីពាក់ព័ន្ធ អញ្ជើញចុះពិនិត្យទីតាំងប្រារព្ធពិធីសម្ពោធដាក់ឱ្យប្រើប្រាស់ជាផ្លូវការនូវអគារសិក្សា និងអគាររដ្ឋបាលសមិទ្ធផលនានានៃសកលវិទ្យាល័យសម្ដេចអគ្គមហាសេនាបតីតេជោ ហ៊ុន សែន ស្ថិតក្នុងភូមិជ្រោយថ្ម សង្កាត់បឹងកុក ក្រុងកំពង់ចាម ដែលគ្រោងនឹងដាក់សម្ពោធដាក់ឱ្យប្រើប្រាស់ជាផ្លូវការនៅពេលខាងមុខ ក្រោមអធិបតីភាពដ៏ខ្ពង់ខ្ពស់ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង និងជាមេបញ្ជាការកងទ័ពជើងគោក តំណាងដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុន សែន ។

បន្ទាប់មក ឯកឧត្តម អភិបាលខេត្តក៏បានដឹកនាំក្រុមការងារ បន្តចុះពិនិត្យផ្លូវDBST និងហេដ្ឋារចនាសម្ព័ន្ឋមួយចំនួនទៀត ស្ថិតនៅសង្កាត់ សំបួរមាស ក្រុងកំពង់ចាម ដើម្បីត្រៀមដាក់សម្ពោធដាក់ឱ្យប្រើប្រាស់ជាផ្លូវការនាពេលខាងមុខផងដែរ៕