រុស្ស៊ីនិយាយថា “ការស្ដារឡើងវិញនូវកិច្ចចរចាសន្តិភាព” បន្ទាប់ពីរឹបអូសបានទីក្រុង Mariupol របស់អ៊ុយក្រែន!
ប្រទេសរុស្ស៊ីបាននិយាយកាលពីថ្ងៃព្រហស្បតិ៍ថា ជំហានបន្ទាប់នៃកិច្ចចរចាសន្តិភាព និងស្តារឡើងវិញ គឺទាល់តែរុស្សុីគ្រប់គ្រងទីក្រុង Mariupol ភាគអាគ្នេយ៍នៃប្រទេសអ៊ុយក្រែន បានទាំងស្រុងជាមុនសិន។
អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅក្នុងសន្និសីទសារព័ត៌មាននៅទីក្រុងមូស្គូថា” Mariupol ដែលបានក្លាយជាកន្លែងប្រមូលផ្តុំនៃការបង្កើតជាតិនិយមត្រូវបានរំដោះ។ ថ្ងៃនេះ (រដ្ឋមន្ត្រីក្រសួងការពារជាតិ Sergey) Shoygu បានរាយការណ៍ទៅ (ប្រធានាធិបតីវ្ល៉ាឌីមៀ) ពូទីន ថាឥឡូវនេះមានឱកាសមួយដើម្បីចាប់ផ្តើមស្តារជីវិតដោយសន្តិភាព បញ្ជូនប្រជាជនត្រឡប់ទៅផ្ទះរបស់ពួកគេវិញ” ។
អ្នកនាំពាក្យរូបនេះបានបន្ថែមថា កងទ័ពអ៊ុយក្រែនដែលបានឡោមព័ទ្ធនៅរោងចក្រ Metallurgical Combine Azovstal នឹងមិនរារាំងដល់ការស្ដារឡើងវិញនូវជីវិតសន្តិភាពនៅ Mariupol នោះទេ។
មុននេះ រដ្ឋមន្ត្រីការពារជាតិរុស្ស៊ីបាននិយាយកាលពីថ្ងៃព្រហស្បតិ៍ថា កងទ័ពរុស្ស៊ីបានកាន់កាប់ទីក្រុងកំពង់ផែ Mariupol ដែលឡោមព័ទ្ធរបស់អ៊ុយក្រែនទាំងស្រុងហើយ។
លោក Shoygu បាននិយាយនៅក្នុងកិច្ចប្រជុំជាមួយលោក Putin នៅទីក្រុងមូស្គូថា ” Mariupol ត្រូវបានរំដោះដោយកងកម្លាំងប្រដាប់អាវុធនៃសហព័ន្ធរុស្ស៊ី និងកងកម្លាំងនៃកងជីវពលប្រជាជននៃសាធារណរដ្ឋប្រជាមានិត Donetsk” ។
លោក Peskov បានសង្កត់ធ្ងន់ថា កងទ័ពអ៊ុយក្រែនគួរតែដាក់អាវុធចុះចាញ់ ហើយចាកចេញពីរោងចក្រដែលឡោមព័ទ្ធតាមរយៈការឆ្លងកាត់ប្រកបដោយសុវត្ថិភាព។ លោកបានបន្តថា ទន្ទឹមនឹងនេះ «ប្រតិបត្តិការយោធាពិសេសរបស់រុស្ស៊ីកំពុងបន្តតាមផែនការ»។
និយាយអំពីកិច្ចចរចាសន្តិភាពរុស្ស៊ី-អ៊ុយក្រែន លោក Peskov បាននិយាយថា ទីក្រុងមូស្គូមិនបានផ្លាស់ប្តូរសមាសភាពគណៈប្រតិភូរបស់ខ្លួននៅឯការចរចាជាមួយទីក្រុង Kyiv ហើយបានសម្តែងការភ្ញាក់ផ្អើលចំពោះសេចក្តីថ្លែងការណ៍របស់ប្រធានាធិបតីអ៊ុយក្រែនលោក Volodymyr Zelenskyy ថាលោកមិនបានឃើញសេចក្តីព្រាងសន្ធិសញ្ញារុស្ស៊ីនោះទេ។
អ្នកនាំពាក្យរូបនេះ បានបន្ថែមថា ភាគីរុស្ស៊ីបានរៀបចំ និងប្រគល់ឯកសារចុងក្រោយដល់សមភាគីអ៊ុយក្រែន ហើយឥឡូវនេះកំពុងរង់ចាំការឆ្លើយតប។
គួរជម្រាបថា មមកទល់នឹងពេលនេះ យ៉ាងហោចណាស់ជនស៊ីវិល 2,224 នាក់ត្រូវបានសម្លាប់ និង 2,897 នាក់បានរងរបួស ខណៈដែលប្រជាជនអ៊ុយក្រែនជាង 5 លាននាក់បានភៀសខ្លួនទៅកាន់ប្រទេសផ្សេងទៀត ដោយមានជាង 7 លាននាក់ទៀតត្រូវបានផ្លាស់ទីលំនៅខាងក្នុង៕
