Cristiano Ronaldo ត្រូវបានគេថតរូបជាលើកដំបូងចាប់តាំងពីមរណភាពដ៏សោកនាដកម្មរបស់កូនប្រុសទើបកើតរបស់គេ។
ខ្សែប្រយុទ្ធរបស់ក្រុម Manchester United ត្រូវបានក្លឹបរបស់គាត់ផ្តល់នូវវេលាសម្រាក់ឱ្យបានយូរតាមដែលគាត់ត្រូវការ ប៉ុន្តែរូបគេ បានត្រឡប់មកមូលដ្ឋានហ្វឹកហាត់ Carrington កាលពីថ្ងៃពុធ ជាមួយមិត្តរួមក្រុម ក្រោយសម្រាកបាន 48ម៉ោងតែប៉ុណ្ណោះ។
Ronaldo បានអវត្តមានសម្រាប់ការបរាជ័យក្នុងលទ្ធផល 4-0 ក្រោមស្នាដៃក្រុមហង្សក្រហម Liverpool កាលពីយប់ថ្ងៃអង្គារ ហើយមានការកើនឡើងនៃការគាំទ្រសម្រាប់ទាំងគាត់ និងដៃគូរបស់គាត់គឺ Georgina Rodriguez ។
គ្រប់គ្នាពិតជាបានដឹងហើយថា Ronaldo និងនាង Rodriguez កាលពីថ្ងៃចន្ទ បានបញ្ជាក់ពីការស្លាប់របស់ទារករបស់ពួកគេថាជា “ការឈឺចាប់ដ៏ធំបំផុត”។
ក្នុងសំណេរនោះមានន័យថា៖“វាជាការសោកស្តាយយ៉ាងខ្លាំងបំផុតរបស់យើងដែលយើងត្រូវប្រកាសថាទារករបស់យើងបានទទួលមរណភាព។ វាគឺជាការឈឺចាប់ដ៏ធំបំផុតដែលឪពុកម្តាយគ្រប់រូបអាចមានអារម្មណ៍”។
“មានតែកំណើតកូនស្រីរបស់យើងប៉ុណ្ណោះដែលផ្តល់កម្លាំងចិត្តឱ្យយើងរស់នៅពេលនេះដោយក្តីសង្ឃឹម និងសុភមង្គល។ យើងសូមថ្លែងអំណរគុណចំពោះគ្រូពេទ្យ និងគិលានុបដ្ឋាយិកាសម្រាប់ការថែទាំ និងការគាំទ្ររបស់អ្នកជំនាញទាំងអស់”។
“យើងទាំងអស់គ្នាមានការសោកស្ដាយចំពោះការបាត់បង់នេះ ហើយយើងសូមសុំភាពឯកជនក្នុងពេលដ៏លំបាកនេះ។ កូនរបស់យើង អ្នកគឺជាទេវតារបស់យើង។ យើងនឹងស្រឡាញ់អ្នកជានិច្ច”។
គួរជម្រាបថា Man United មានការប្រកួតដ៏ធំមួយទល់នឹងក្រុម Arsenal នៅថ្ងៃសៅរ៍នេះ ហើយខ្សែប្រយុទ្ធដ៏ឆ្នើមរបស់ពួកគេនឹងមានវត្តមានសម្រាប់ជ្រើសរើសដំបូង៕
