អភិបាលខេត្តកំពង់ចាម ៖ វត្តមានរបស់ ឧត្តមសេនីយ៍ឯក ហ៊ុន ម៉ាណែត ពិតជាបង្ហាញនូវការលើកទឹកចិត្ត និងការយកចិត្តទុកដាក់ ដល់សមណនិស្សិត និងនិស្សិតក្រីក្រ!
នៅរសៀលថ្ងៃទី០២ ខែឧសភា ឆ្នាំ២០២២ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានអញ្ជើញចូលរួម ក្នុងពិធីសម្ភោធដាក់ឱ្យប្រើប្រាស់ ផ្លូវការអាគារសិក្សា អាគាររដ្ឋបាល និងពិធីប្រគេន-ប្រគល់សញ្ញាបត្រជូនសមណនិស្សិត និស្សិតថ្នាក់បរិញ្ញាបត្រ នៃពុទ្ធិកសាកលវិទ្យាល័យ សម្ដេចអគ្គមហាសេនាបតីតេជោ ហ៊ុន សែន ក្រោមអធិបតីភាពដ៏ខ្ពង់ខ្ពស់ ឯកឧត្តមឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក តំណាងដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ។ ពិធីនេះប្រព្រឹត្តទៅនៅវត្តសុទស្សនារាមជ្រោយថ្ម សង្កាត់បឹងកុក ក្រុងកំពង់ចាម ដោយមានការនិមន្ត និងអញ្ជើញចូលរួមពីសំណាក់ឯកឧត្តម លោកជំទាវ លោក លោកស្រីថ្នាក់ដឹកនាំក្រុមការងាររាជរដ្ឋាភិបាលចុះមូលដ្ឋានក្រុង-ស្រុក ក្នុងខេត្តកំពង់ចាម ថ្នាក់ដឹកនាំមន្ទីរអង្គភាពជុំវិញខេត្ត គណៈគ្រប់គ្រងពុទ្ធិកនៃសកលវិទ្យាល័យ និងសមណនិសិ្សត និស្សិតជ័យលាភីជាច្រើនរូប។
ឯកឧត្តម អ៊ុន ចាន់ដា អភិបាលខេត្តកំពង់ចាម បានមានប្រសាសន៍ថា វត្តមានរបស់ឧត្តមសេនីយ៍ឯក ហ៊ុន ម៉ាណែត នាឱកាសនេះ ពិតជាបង្ហាញនូវការលើកទឹកចិត្ត និងការយកចិត្តទុកដាក់ ដល់សមណនិស្សិត និង និស្សិត ក្រីក្រដែលមិនមានលទ្ធភាពទៅ សិក្សានៅសាលាឯកជន ហើយវាក៏ជាការគិតគូពីសំណាក់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាផងដែរ។
ឯកឧត្តម អភិបាលខេត្ត បានមានប្រសាសន៍បន្តថា ព្រះរាជាណាចក្រកម្ពុជា គឺបានអភិវឌ្ឍន៍គ្រប់វិស័យ ទាំងពុទ្ធចក្រ និងអាណាចក្រ ដោយបានចាត់ទុកពុទ្ធចក្រ និងអាណាចក្រ គឺជាកង់ទាំងគូរសម្រាប់ទ្រទ្រង់ជាតិ និងនាំជាតិឆ្ពោះទៅកាន់វឌ្ឍនភាព ដែលមិនអាចខ្វះកង់ចក្រមួយណាបានឡើយ ទោះបីជាបច្ចុប្បន្នវិស័យអប់រំខាងអាណាចក្រមានការីកចម្រើន ក៏នៅតែត្រូវការខាងពុទ្ធចក្រ ប្រៀបដូចជាជើងឆ្វេង និងជើងស្តាំ សម្រាប់ទ្រទ្រងដងខ្លួនទាំងមូល បើយើងក្រឡេកមើលពីអតីតកាលវិស័យពុទ្ធចក្រ បានដើរតួនាទីយ៉ាងសំខាន់ក្នុងការបណ្តុះបណ្តាលធនធានមនុស្ស។ ដូចនេះ យើងអាចនិយាយបានថា វិស័យពុទ្ធចក្រ គឺជាប្រភពនៃការអប់រំ និងជាកំលាំងចលករ ដែលមិនអាចខ្វះបាន តួយ៉ាងសមិទ្ធិផលនានា មានជាអាទិ៍វត្តអារាម និងសមិទ្ធផលនានាជា
ច្រើនឥតគណនាបាន គឺសុទ្ធតែកើតចេញពីកម្លាំង មហាសាមគ្គី និងជំនឿដ៏មុតមាំរបស់ប្រជាពលរដ្ឋចំពោះព្រះពុទ្ធសាសនា។ គ្រប់សមិទ្ធិផលទាំងអស់ដែលយើងមានសព្វថ្ងៃវាជាភស្តុតាង ដែលបង្ហាញពីការដឹកនាំដ៏ត្រឹមត្រូវប្រកបដោយការទទួលខុសត្រូវខ្ពស់ ចំពោះជោគវាសនារបស់ប្រទេសជាតិពីសំណាក់ថ្នាក់ដឹកនាំរបស់គណបក្សប្រជាជនកម្ពុជា ដែលជានិច្ចកាល តែងតែយកចិត្តទុកដាក់ផលប្រយោជន៍ជាតិ និងសុខទុក្ខរបស់ប្រជាពលរដ្ឋជាធំ។
ជាងនេះទៅទៀត គ្រប់កាលៈទេសៈ សម្ដេចតេជោ តែងបានគិតគូរជាប់ជាប្រចាំអំពីសុខទុក្ខរបស់ប្រជាពលរដ្ឋ ហើយតែងតែនៅក្បែរប្រជាពលរដ្ឋក្នុងគ្រប់ស្ថានការណ៍ ដោយមិនមានពេលណាមួយដែលទុកប្រជាពលរដ្ឋចោលនោះឡើយ។ ពិសេសគុណបំណាច់ដ៏ថ្លៃថ្លារបស់សម្ដេចតេជោ បានការពារ និងស្រោចស្រង់អាយុជីវិតប្រជាជនកម្ពុជាពីជំងឺដ៏មហាប្រល័យកូវីដ-១៩ បានញ៉ាំងចិត្តឱ្យយើងខ្ញុំទាំងអស់គ្នាដឹងគុណជានិច្ច ចំពោះការគិតគូរពីសំណាក់សម្តេចប្រមុខរាជរដ្ឋាភិបាលកម្ពុជា ហើយយើងខ្ញុំទាំងអស់គ្នា ប្តេជ្ញាគាំទ្រ សម្តេចអគ្គមហាសេនាបតី ហ៊ុនសែន ជានាយករដ្ឋមន្ដ្រីអាណាត្តិទី៧ និងអាណត្តិក្រោយៗទៀត ដើម្បីឱ្យសម្តេចតេជោ បន្តដឹកនាំនាវាកម្ពុជាឆ្ពោះទៅរកវឌ្ឍភាពរុងរឿងបន្ថែមទៀត៕
