មនុស្ស 60 នាក់ត្រូវបានគេជឿថាបានស្លាប់បន្ទាប់ពីការវាយប្រហារនៅសាលារៀន ដោយរុស្ស៊ីនៅភាគខាងកើតអ៊ុយក្រែន!
យ៉ាងហោចណាស់មនុស្ស 60 នាក់កំពុងបាត់ខ្លួន ឬត្រូវបានចាត់ទុកថាបានស្លាប់ នៅក្នុងកំទេចកំទីនៃសាលារៀនមួយដែលត្រូវបានឆេះបន្ទាប់ពីការវាយឆ្មក់តាមអាកាសរបស់រុស្ស៊ីនៅភាគខាងកើតអ៊ុយក្រែន។
អភិបាលនៃតំបន់ Luhansk លោក Serhiy Haidai បាននិយាយកាលពីថ្ងៃអាទិត្យថា មនុស្សពីរនាក់ត្រូវបានបញ្ជាក់ថាបានស្លាប់ បន្ទាប់ពីកងកម្លាំងរុស្ស៊ីបានទម្លាក់គ្រាប់បែកទៅលើសាលារៀនមួយ ហើយជនស៊ីវិល 30 នាក់ត្រូវបានទាញចេញពីកំទេចកំទីអាគារ។
លោក Haidai បាននិយាយថា មនុស្សប្រហែល 90 នាក់បានចូលទៅជ្រកកោននៅក្នុងសាលារៀននៅក្នុងភូមិ Bilohorivka បន្ទាប់ពីរងការវាយប្រហារកាលពីថ្ងៃសៅរ៍។
ហើយមនុស្ស 30 នាក់ត្រូវបានជម្លៀសចេញពីគំនរបាក់បែក ក្នុងនោះ 7 នាក់បានរងរបួស។ រីឯមនុស្ស៦០នាក់ទៀតទំនងជាបានស្លាប់ក្រោមគំនរបាក់បែកនៃអគារ។
ទោះជាយ៉ាងណា អ៊ុយក្រែន និងលោកខាងលិចបានចោទប្រកាន់កងកម្លាំងរុស្ស៊ី ថាជាឧក្រិដ្ឋកម្មសង្គ្រាម ដែលមានចេតនាកំណត់គោលដៅលើជនស៊ីវិលអ៊ុយក្រែន៕
