អេឡុន ម៉ាស សន្យាថា នឹងដកបម្រាមលើគណនីដូណាល់ ត្រាំ នៅពេលកិច្ចព្រមព្រៀងទិញTwitterទទួលជោគជ័យ!
លោក អេឡុន ម៉ាស និយាយនៅក្នុងវេទិការមួយថា ប្រសិនបើការដេញថ្លៃរបស់លោកក្នុងការទិញ Twitter ទទួលបានជោគជ័យ លោកនឹងលើកលែងការហាមឃាត់លើលោក ដូណាល់ ត្រាំ (Donald Trump)។
មហាសេដ្ឋីលំដាប់ពិភពលោករូបនេះ បានយល់ព្រមលើការដេញថ្លៃទិញ Twitter ក្នុងតម្លៃ ៤៤ពាន់លានដុល្លារ ត្រូវនឹងជាង ៣៤ពាន់លានផោន កាលពីខែមុន។ ប៉ុន្តែលោកបាននិយាយថា កិច្ចព្រមព្រៀងនេះមិនទាន់បានបញ្ចប់ទេ ហើយវាអាចប្រើរយៈពេលពីរទៅបីខែខាងមុខទៀត។
កាសែត Financial Times បានផ្សាយពីសម្តីលោក ម៉ាស់ ថាការសម្រេចចិត្តរបស់ Twitter ក្នុងការហាមឃាត់អតីតប្រធានាធិបតីអាម៉េរិកគឺ ខុសសីលធម៌ និងធ្វើឡើងដោយភាពល្ងង់ខ្លៅ។
គួររំលឹកថា នៅខែមករាឆ្នាំ ២០២១ Twitter បាននិយាយថាគណនីរបស់លោក ត្រាំ ត្រូវបានផ្អាកជាអចិន្ត្រៃយ៍ ដោយសារតែហានិភ័យនៃការញុះញង់ឱ្យមានអំពើហិង្សាបន្ថែមទៀត ក្រោយពីលោកបានហៅអ្នកវាយប្រហារវិមាន កាពីតូល របស់សហរដ្ឋអាម៉េរិកថាជា «អ្នកស្នេហាជាតិ»។
ប៉ុន្តែម្ចាស់ក្រុមហ៊ុន តេស្លាវ័យ50ឆ្នាំរូបនេះ បាននិយាយថា៖ «ខ្ញុំនឹងលុបចោលការហាមឃាត់ជាអចិន្ត្រៃយ៍ ប៉ុន្តែខ្ញុំមិនទាន់ជាម្ចាស់ Twitter នៅឡើយទេ ដូច្នេះនេះមិនមែនជារឿងដែលប្រាកដថានឹងកើតឡើងនោះទេ»។
លោកបានលើកឡើងទៀតថា “ការហាមប្រាមនេះ មិនបានធ្វើឱ្យលោក ត្រាំ ស្ងាត់ស្ងៀមនោះទេ ប៉ុន្តែវាធ្វើឱ្យលោកផ្លាស់ប្ដូរទៅកាន់គេហទំព័រ Truth Social ផ្ទាល់របស់លោក ដែលបានពង្រីកមតិរបស់លោកកាន់តែខ្លាំង”។
យ៉ាងណាមិញ លោក ត្រាំ ធ្លាប់បានអះអាងថា លោកនឹងមិនត្រលប់មករក Twitter វិញទេ បើទោះបីជាគណនីរបស់លោកត្រូវបានស្តារឡើងវិញក៏ដោយ៕
