តុលាការកំពូលរបស់សាធារណរដ្ឋប្រជាមានិត Donetsk (DPR) បានកាត់ទោសប្រហារជីវិតចំពោះទាហានស៊ីឈ្នួលបីនាក់ ដែលត្រូវបានចាប់ខ្លួនអំឡុងពេលប្រយុទ្ធដើម្បីកងកម្លាំងអ៊ុយក្រែន។
ក្នុងចំណោមនោះ មានជនជាតិអង់គ្លេសចំនួន២នាក់ឈ្មោះ Aiden Aslin និង Shaun Pinner និងជនជាតិម៉ារ៉ុកម្នាក់ឈ្មោះ Saadun Brahim។
យោងតាមច្បាប់ DPR ការប្រហារជីវិតនឹងអនុវត្តត្រឹមតែមួយទម្រង់ប៉ុណ្ណោះ ពោលគឺអ្នកទាំង៣នឹងត្រូវប្រហារជីវិតដោយការបាញ់កាំភ្លើង ពីសំណាក់ក្រុមពេជ្ឈឃាត។
ទោះជាយ៉ាងណា ប្រធានអង្គចៅក្រមនិយាយថា ទណ្ឌិតអាចប្តឹងឧទ្ធរណ៍បានលើសេចក្តីសម្រេចរបស់តុលាការក្នុងរយៈពេលមួយខែ។
គួរជម្រាបថា ទាហានស៊ីឈ្នួលទាំងបីនាក់នេះ បានសារភាពទទួលកំហុស លើការចោទប្រកាន់ពីបទព្យាយាមដណ្តើមអំណាចដោយបង្ខំ។
ជនជាតិអង់គ្លេសឈ្មោះ Aiden Aslin ក៏បានសារភាពកំហុសផងដែរ ថាបានទទួលការបណ្តុះបណ្តាលក្នុងគោលបំណងចូលរួមសកម្មភាពភេរវកម្ម។ តុលាការបានសម្រេចថា អ្នកទាំងបីបានទទួលប្រាក់ឈ្នួល សម្រាប់ការប្រយុទ្ធនៅខាងកងកម្លាំងអ៊ុយក្រែន។
ក្នុងនោះ ប្រធានអង្គចៅក្រមក៏បានកត់សម្គាល់ផងដែរថា ទាហានស៊ីឈ្នួលម្នាក់ឈ្មោះ Shaun Pinner កំពុងត្រូវបានចក្រភពអង់គ្លេសប្រកាសតាមចាប់ខ្លួន ក្នុងនាមជាភេរវករសម្រាប់ការប្រយុទ្ធជាមួយក្រុមសកម្មប្រយុទ្ធនៅក្នុងប្រទេសអ៊ីរ៉ាក់ និងស៊ីរី។
ដោយឡែក មេធាវីម្នាក់ក្នុងចំណោមមេធាវីរបស់ទាហានស៊ីឈ្នួលដែលត្រូវបានចាប់ខ្លួន បាននិយាយថា មេធាវីការពារក្តីគ្រោងនឹងប្តឹងឧទ្ធរណ៍ចំពោះសេចក្តីសម្រេចរបស់តុលាការ និងព្យាយាមលើកលែងទោសប្រហារជីវិតអ្នកទាំងបី។
ចុងចោទក៏អាចស្នើសុំឲ្យអាជ្ញាធររដ្ឋាភិបាល DPR លើកលែងទោសពួកគេផងដែរ។ ក្នុងករណីនេះ ការកាត់ទោសប្រហារជីវិតរបស់ពួកគេ នឹងត្រូវបានជំនួសដោយការជាប់ពន្ធនាគាររយៈពេល ២៥ ឆ្នាំវិញ៕
