អឺរ៉ុប ព្រមានឲ្យត្រៀមខ្លួនសម្រាប់ការកាត់ផ្ដាច់ការផ្គត់ផ្គង់ឧស្ម័នពីរុស្ស៊ីទាំងស្រុង នៅរដូវរងាខាងមុខ!
លោក Fatih Birol ប្រធានទីភ្នាក់ងារថាមពលអន្តរជាតិបានព្រមានអឺរ៉ុបឱ្យត្រៀមខ្លួនសម្រាប់លទ្ធភាពនៃការកាត់ផ្ដាច់ការផ្គត់ផ្គង់ទាំងស្រុងនៃឧស្ម័នរបស់រុស្ស៊ី នៅរដូវរងាខាងមុខនេះ ដោយអំពាវនាវឱ្យរដ្ឋាភិបាលសហភាពអឺរ៉ុប ពង្រីកវិសាលភាពនៃវិធានការសំដៅរៀបចំ សម្រាប់សេណារីយ៉ូនេះ។ នេះបើយោងតាមកាសែត Financial Times បានរាយការណ៍។
លោក Birol បាននិយាយថា អឺរ៉ុប គួរតែត្រៀមខ្លួនក្នុងករណីដែលឧស្ម័នរុស្ស៊ី ត្រូវបានកាត់ផ្តាច់ទាំងស្រុង ដោយបន្ថែមថា កាន់តែខិតជិតដល់រដូវរងា យើងកាន់តែយល់ច្បាស់ពីចេតនារបស់រុស្ស៊ី ។ លោក Birol អះអាងថា ខ្ញុំជឿថានឹងមានវិធានការទាមទារកាន់តែច្រើន និងកាន់តែស៊ីជម្រៅដែលធ្វើឡើងដោយរដ្ឋាភិបាលអឺរ៉ុប នៅពេលដែលរដូវរងាកាន់តែខិតជិតមកដល់។
សូមជម្រាបថា អឺរ៉ុប បានកាត់ផ្ដាច់ការផ្គត់ផ្គង់ឧស្ម័នពីរុស្ស៊ី អស់មួយចំនួនធំ បន្ទាប់ពីផ្ទុះសង្គ្រាមឈ្លានពានលើអ៊ុយក្រែន ដែលជាផ្នែកមួយនៃការដាក់ទណ្ឌកម្មប្រឆាំងនឹងទីក្រុងមូស្គូ ខណនៅរដូវរងាខាងមុខនេះ គឺគ្រោងនឹងកាត់ផ្ដាច់ទាំងស្រុងតែម្ដង៕
