លោក Zelensky ព្រមានថា សង្គ្រាមលោកលើកទី៣ នឹងកើតឡើង ប្រសិនបើការចរចាជាមួយរុស្ស៊ីបរាជ័យ!
ប្រធានាធិបតីអ៊ុយក្រែន លោក Volodymyr Zelensky បាននិយាយកាលពីថ្ងៃអាទិត្យថា លោកបានត្រៀមខ្លួនរួចជាស្រេចសម្រាប់ការចរចាជាមួយប្រធានាធិបតីរុស្ស៊ី លោក Vladimir Putin ហើយថែមទាំងបានព្រមានថា ក្នុងករណីដែលការចរចាមិនមានផ្លែផ្កា” នោះមានន័យថា សង្រ្គាមលោកលើកទីបី WWIII នឹងផ្ទុះឡើង។
ក្នុងសារសម្លេងដដែលនោះ លោកបានលើកឡើងថា លោកបានត្រៀមខ្លួនរួចជាស្រេចក្នុងការចរចាជាមួយលោក ពូទីន ក្នុងរយៈពេលពីរឆ្នាំចុងក្រោយនេះ ហើយលោកក៏គិតផងដែរថា ការសន្ទនា គឺជាមធ្យោបាយតែមួយគត់ដើម្បីបញ្ចប់សង្រ្គាមដ៏អាក្រក់នេះ។
លោកបានបន្ថែមថា “ខ្ញុំគិតថាយើងត្រូវតែប្រើទម្រង់ណាមួយ ឱកាសណាមួយដើម្បីមានលទ្ធភាពចរចា លទ្ធភាពក្នុងការនិយាយជាមួយពូទីន។ ប៉ុន្តែប្រសិនបើការប៉ុនប៉ងទាំងនេះបរាជ័យ នោះមានន័យថានេះគឺជាសង្រ្គាមលោកលើកទីបី”។
Zelensky បានដាក់គោលដៅ និងជំរុញឱ្យមានការចរចាបន្ថែមទៀតប៉ុន្មានថ្ងៃនេះ ដោយសារតែសង្រ្គាមបានបន្តអស់រយៈពេល 4 សប្តាហ៍ ដោយបានណែនាំលោក Putin ឱ្យអង្គុយនៅតុ បើមិនដូច្នោះទេ រុស្ស៊ីនឹងមានការខាតបង់ “ដ៏ធំ” ។
យើងដឹងហើយថា ដើមចមនៃសង្គ្រាមរវាងអ៊ុយក្រែន និងរុស្ស៊ី បានផ្ទុះឡើង បន្ទាប់ពីអង្គការណាតូ អូតង់ បានប្រកាសពីគម្រោង បញ្ចូលប្រទេសអ៊ុយក្រែនជាសមាជិករបស់ខ្លួន។
ទោះបីជាអ៊ុយក្រែនត្រូវបានអញ្ជើញឱ្យចូលរួមក្នុងអង្គការណាតូក៏ដោយ ប៉ុន្តែលោក Zelensky មានការស្ទាក់ស្ទើរក្នុងការចូលរួម ដោយបានលើកឡើងថា គោលដៅចម្បងរបស់គាត់គឺសុវត្ថិភាពរបស់ប្រជាជនអ៊ុយក្រែន។
សូមជម្រាបថា ណាតូ អូតង់ NATO.OTAN ជាសម្ព័ន្ធមិត្តដែលបង្កើតឡើងដោយប្រទេសចំនួន៣០។ បង្កើតឡើងក្នុងកំឡុងសង្គ្រាមត្រជាក់រវាងសហរដ្ឋអាមេរិក និងសហភាពសូវៀត វាតំណាងឱ្យការរួបរួមក្នុងចំណោមប្រទេសដែលមានផលប្រយោជន៍ និងតម្លៃស្រដៀងគ្នា។ អត្ថប្រយោជន៍មួយនៃសម្ព័ន្ធភាពនេះគឺថា ប្រសិនបើប្រទេសណាមួយត្រូវបានវាយប្រហារ ប្រទេសចំនួន 29 នឹងចូលរួមជាមួយពួកគេក្នុងជំនួយ និងការសងសឹក។
ចាប់តាំងពីពេលនោះមក ប្រទេសផ្សេងៗគ្នាដែលមានព្រំដែនជាប់នឹងរុស្ស៊ីបានចូលរួមជាមួយអង្គការណាតូអស់រយៈពេល 20 ឆ្នាំមកនេះ លោកពូទីនមិនសប្បាយចិត្តជាខ្លាំងចាប់តាំងពីលោកមើលឃើញថាពួកគេជាសត្រូវ៕
