ព្រោះតែបំណុលវ័ណ្ឌក ស្រីលង្កា ប្រកាសលក់ហ៊ុននៃក្រុមហ៊ុនអាកាសចរណ៍ជាតិទៅអ្នកវិនិយោគបរទេស!
ប្រទេសស្រីលង្កាកាលពីថ្ងៃចន្ទបានប្រកាសនឹងលក់ភាគហ៊ុនចំនួន ៤៩ ភាគរយនៃក្រុមហ៊ុនអាកាសចរណ៍ជាតិដែលកំពុងវ័ណ្ឌ កដោយបំណុល ទៅឲ្យអ្នកវិនិយោគបរទេស ខណៈដែលបំណុលរបស់ក្រុមហ៊ុនអាកាសចរណ៍ Sri Lankan Airlines ឈានដល់ ១.១២ ពាន់លានដុល្លារ ។
រដ្ឋមន្ត្រីកំពង់ផែ ដឹកជញ្ជូន និងអាកាសចរណ៍លោក Nimal Siripala De Silva បាននិយាយថា ភាគហ៊ុន ៤៩ ភាគរយរបស់ក្រុមហ៊ុន Sri Lankan Airlines នឹងលក់ទៅអ្នកវិនិយោគបរទេស ខណៈដែល ៥១ ភាគរយនឹងត្រូវបានរក្សាទុកជាមួយរដ្ឋ ហើយប្រាក់ដែលទទួលបានពីការរៀបចំឡើងវិញនូវរចនាសម្ព័ន្ធក្រុមហ៊ុនអាកាសចរណ៍ នឹងត្រូវយកទៅសងបំណុល ។
ទន្ទឹមនោះ រដ្ឋាភិបាលក៏បានបង្ហាញផងដែរថា ក្រុមប្រឹក្សាភិបាលអគ្គិសនីរដ្ឋ Ceylon អាចនឹងត្រូវធ្វើឯកជនភាវូបនីយកម្ម ដោយសារតែការខាតបង់កំពុងកើនឡើង ហើយការសម្រេចចិត្តកាត់បន្ថយការចំណាយរបស់រដ្ឋាភិបាលត្រូវបានធ្វើឡើងនៅពីក្រោយវាំងនននៃការចរចាដែលកំពុងបន្ត ដើម្បីឈានដល់កញ្ចប់ថវិកាសង្គ្រោះចំនួន ៣ ពាន់លានដុល្លារជាមួយមូលនិធិរូបិយវត្ថុអន្តរជាតិ (IMF) ។
គួររំលឹកថា កាលពីសប្តាហ៍មុន ក្រុម IMF បានមកដល់ប្រទេសនេះ ដើម្បីពិភាក្សាអំពីកញ្ចប់ថវិកាសង្គ្រោះជាមួយមន្ត្រីជាន់ខ្ពស់រដ្ឋាភិបាល រួមទាំងប្រធានាធិបតីលោក Ranil Wickremesinghe ផងដែរ ហើយក្នុងនោះក្រុម IMF ក៏បានពិភាក្សាអំពីការរៀបចំរចនាសម្ព័ន្ធឡើងវិញនូវបំណុលរបស់ប្រទេសស្រីលង្កាដែលមានប្រហែល ២៩ ពាន់លានដុល្លារ ។
គួរបញ្ជាក់ថា ប្រទេសកោះដែលមានប្រជាជនចំនួន ២២ លាននាក់មួយនេះកំពុងប្រឈមមុខនឹងវិបត្តិសេដ្ឋកិច្ចដ៏អាក្រក់បំផុតរបស់ខ្លួន ចាប់តាំងពីឆ្នាំ ១៩៤៨ ដោយសារតែទុនបម្រុងរូបិយប័ណ្ណបរទេសបានធ្លាក់ចុះដល់ ៣០០ លានដុល្លារ អំឡុងពេលរោគរាតត្បាតកូវីដ ១៩ ៕
