ប្រទេសតាជីគីស្ថានបាននិយាយថា ពលរដ្ឋរបស់ខ្លួនចំនួន ៣៥នាក់ត្រូវបានសម្លាប់នៅក្នុងការប៉ះទង្គិចព្រំដែនចុងក្រោយជាមួយប្រទេសកៀហ្ស៊ីស៊ីស្ថាន ដែលធ្វើឲ្យចំនួនអ្នកស្លាប់សរុបកើនដល់យ៉ាងហោចណាស់ ៨១នាក់។
នៅលើទំព័រ Facebook របស់ខ្លួន ក្រសួងការបរទេស Tajik បានរាយការណ៍ថា មនុស្ស ៣៥ នាក់បានស្លាប់រួមទាំងជនស៊ីវិល ស្ត្រី និងកុមារ។ ខណៈដែលមនុស្ស ១៣៩ នាក់ទៀតបានរងរបួសនៅក្នុងការប្រយុទ្ធគ្នានៅព្រំដែនភាគនិរតី។ ហើយអ្នកស្រុកជិត ១៣៦,០០០ ក៏ត្រូវបានជម្លៀសចេញពីភូមិនានានៅជិតប្រទេសតាជីគីស្ថានផងដែរ។
ទន្ទឹមនឹងនេះដែរ ចំនួនអ្នកស្លាប់នៅខាងកៀហ្ស៊ីស៊ីស្ថានបានកើនឡើងដល់ ៤៦ នាក់ ដែលធ្វើឱ្យវាក្លាយជាការផ្ទុះឡើងដ៏អាក្រក់បំផុតរវាងប្រទេសអាស៊ីកណ្តាលទាំងពីរក្នុងរយៈពេលជាច្រើនឆ្នាំ។
យ៉ាងណាមិញ ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃអាទិត្យ បានអំពាវនាវកុំឲ្យមានការកើនឡើងបន្ថែមទៀត រវាងកៀហ្ស៊ីស៊ីស្ថាន និងតាជីគីស្ថាន។
នៅក្នុងការសន្ទនាតាមទូរស័ព្ទជាមួយមេដឹកនាំនៃប្រជាជាតិអាស៊ីកណ្តាល លោក ពូទីន ក៏បានជំរុញឱ្យពួកគេ “ចាត់វិធានការដើម្បីដោះស្រាយស្ថានការណ៍ឱ្យបានឆាប់តាមដែលអាចធ្វើទៅបានដោយសន្តិភាព នយោបាយ និងការទូតទាំងស្រុង” ។
កាលពីថ្ងៃសុក្រ ភាគីទាំងពីរបានព្រមព្រៀងបទឈប់បាញ់គ្នា ប៉ុន្តែចាប់តាំងពីពេលនោះមក ការប្រយុទ្ធគ្នាបានបន្តដោយភាគីទាំងពីរបានចោទប្រកាន់គ្នាទៅវិញទៅមកថាបានរំលោភលើកិច្ចព្រមព្រៀង។
គួរជម្រាបថា ប្រទេសអតីតសហភាពសូវៀតទាំងពីរឥឡូវនេះគឺជាផ្នែកមួយនៃអង្គការសន្ធិសញ្ញាសន្តិសុខសមូហភាព (CSTO) ដែលដឹកនាំដោយរុស្ស៊ី ប៉ុន្តែពួកគេតែងតែមានភាពតានតឹងកើនឡើង៕
