កូរ៉េខាងជើងនិយាយថា ខ្លួនមិនដែលផ្គត់ផ្គង់សព្វាវុធដល់រុស្ស៊ី និងមិនមានគម្រោងធ្វើដូច្នេះទេ ដោយថ្កោលទោសការអះអាងរបស់សហរដ្ឋអាមេរិក អំពីការផ្ទេរអាវុធសម្រាប់សង្គ្រាមអ៊ុយក្រែនថា ជាការប៉ុនប៉ងធ្វើឱ្យខូចមុខមាត់របស់ប្រទេសរបស់ខ្លួន។
នៅក្នុងសេចក្តីថ្លែងការណ៍មួយ ដែលចេញផ្សាយដោយទីភ្នាក់ងារសារព័ត៌មានកណ្តាលកូរ៉េ កាលពីថ្ងៃព្រហស្បតិ៍ មន្ត្រីការពារជាតិកូរ៉េខាងជើង ដែលមិនបញ្ចេញឈ្មោះ បាននិយាយថា សហរដ្ឋអាមេរិក និងកងកម្លាំងអរិភាពផ្សេងទៀត “កំពុងផ្សព្វផ្សាយ “ពាក្យចចាមអារ៉ាមអំពីទំនាក់ទំនងអាវុធ” រវាងទីក្រុងព្យុងយ៉ាង និងទីក្រុងម៉ូស្គូ។
មន្ត្រីរូបនេះបាននិយាយថា “យើងសូមថ្កោលទោស និងព្រមានយ៉ាងម៉ឺងម៉ាត់ដល់សហរដ្ឋអាមេរិក ជុំវិញការផ្សព្វផ្សាយវោហាសាស្ត្រប្រឆាំងកូរ៉េខាងជើង” ដោយប្រើប្រាស់អក្សរកាត់សម្រាប់ឈ្មោះផ្លូវការសម្រាប់កូរ៉េខាងជើង។
មន្ត្រីរូបនេះបានបន្ថែមថា៖ «យើងមិនដែលបាននាំចេញអាវុធឬគ្រាប់រំសេវទៅរុស្ស៊ីទេពីមុនមកទេ ហើយយើងនឹងមិនមានគម្រោងនាំចេញវានោះដែរ»។
នៅក្នុងសេចក្តីថ្លែងការណ៍នៅលើ KCNA មន្ត្រីកូរ៉េខាងជើងបានប្រាប់សហរដ្ឋអាមេរិកឱ្យឈប់ធ្វើ “ការកត់សម្គាល់ដែលគ្មានមូលដ្ឋានច្បាស់លាស់” និង “បិទមាត់របស់ខ្លួន” ។
មន្ត្រីរូបនេះបានសង្កត់ធ្ងន់ថា” ទីក្រុងព្យុងយ៉ាងមិនដែលទទួលស្គាល់ការដាក់ទណ្ឌកម្ម “ខុសច្បាប់” របស់ក្រុមប្រឹក្សាសន្តិសុខអង្គការសហប្រជាជាតិ ប្រឆាំងនឹងខ្លួនទេ “បើទោះបីដឹងថា សហរដ្ឋអាមេរិក ជាអ្នកនៅពីក្រោយក៏ដោយ”។
ការបដិសេធនេះ បានកើតឡើងប៉ុន្មានសប្តាហ៍បន្ទាប់ពីលោក Vedant Patel អ្នកនាំពាក្យរងក្រសួងការបរទេសអាមេរិក បានប្រាប់អ្នកសារព័ត៌មានថា រុស្ស៊ី “កំពុងស្ថិតក្នុងដំណើរការទិញគ្រាប់រ៉ុក្កែត និងកាំភ្លើងធំរាប់លានគ្រាប់ពីកូរ៉េខាងជើង សម្រាប់ប្រើប្រាស់ក្នុងប្រទេសអ៊ុយក្រែន”។
កាលពីដើមខែនេះ របាយការណ៍ស៊ើបការណ៍សម្ងាត់ដែលទើបបំបែកថ្មីពីសហរដ្ឋអាមេរិកបាននិយាយថា រុស្ស៊ីកំពុងទិញគ្រាប់កាំភ្លើងធំ និងគ្រាប់រ៉ុក្កែតរាប់លានគ្រាប់ពីកូរ៉េខាងជើង ប៉ុន្តែមិនបានលម្អិតទេ។
គួរជម្រាបថា រាល់ការនាំចេញអាវុធរបស់កូរ៉េខាងជើងទៅកាន់ប្រទេសរុស្ស៊ីនឹងបំពានលើដំណោះស្រាយរបស់អង្គការសហប្រជាជាតិដែលហាមឃាត់ប្រទេសនេះមិនឱ្យនាំចូល ឬនាំចេញអាវុធ ហើយរុស្ស៊ីបានបដិសេធការចោទប្រកាន់នេះដោយទាមទារឱ្យសហរដ្ឋអាមេរិកផ្តល់ភស្តុតាង។
ដោយឡែក ទីក្រុងវ៉ាស៊ីនតោន ក៏បានចោទប្រកាន់អ៊ីរ៉ង់ថាបានផ្គត់ផ្គង់យន្តហោះគ្មានមនុស្សបើក ដល់រុស្ស៊ីសម្រាប់ប្រើប្រាស់ក្នុងសង្គ្រាមរបស់ខ្លួននៅអ៊ុយក្រែន ប៉ុន្តែទីក្រុងតេអេរ៉ង់បានបដិសេធចោល៕
