មនុស្ស ១៧នាក់បានស្លាប់ និង ២៤នាក់ទៀតរងរបួស នៅក្នុងការបាញ់ប្រហារនៅសាលាទីក្រុង Izhevsk រុស្ស៊ី! 

អាជ្ញាធរបាននិយាយថា ខ្មាន់កាំភ្លើងម្នាក់បានបើកការបាញ់ប្រហារនៅក្នុងសាលារៀនមួយនៅកណ្តាលប្រទេសរុស្ស៊ី ដោយបានសម្លាប់មនុស្សយ៉ាងហោចណាស់ 17 នាក់ និង 24 នាក់ផ្សេងទៀតរងរបួស មុនពេលបាញ់សម្លាប់ខ្លួនឯង។

នេះបើយោងតាមការផ្សាយរបស់ ALjazeera នៅថ្ងៃទី27 កញ្ញា នេះ។

ការបាញ់ប្រហារនេះបានកើតឡើងកាលពីថ្ងៃចន្ទនៅក្នុងសាលាលេខ 88 ក្នុងទីក្រុង Izhevsk ដែលជាទីក្រុងចម្ងាយ 960 គីឡូម៉ែត្រ (600 ម៉ាយ) ភាគខាងកើតទីក្រុងមូស្គូក្នុងតំបន់ Udmurtia ។

រដ្ឋាភិបាលនៃ Udmurtia បាននិយាយថា មនុស្ស 17 នាក់ រួមទាំងកុមារ 11 នាក់ ត្រូវបានសម្លាប់នៅក្នុងការបាញ់ប្រហារនេះ។ យោងតាមគណៈកម្មាធិការស៊ើបអង្កេតរបស់រុស្ស៊ី មនុស្ស ២៤ នាក់ផ្សេងទៀត រួមទាំងកុមារ ២២ នាក់បានរងរបួសក្នុងការវាយប្រហារនេះផងដែរ។

ទោះជាយ៉ាងណា គណៈកម្មាធិការស៊ើបអង្កេតរបស់ប្រទេសរុស្ស៊ីបានកំណត់អត្តសញ្ញាណខ្មាន់កាំភ្លើងថា មានឈ្មោះ Artyom Kazantsev អាយុ 34 ឆ្នាំ ជានិស្សិតបញ្ចប់ការសិក្សានៅសាលាដូចគ្នា ដែលខ្មាន់កាំភ្លើងពាក់អាវយឺតពណ៌ខ្មៅដែលមាននិមិត្តសញ្ញាណាស៊ី។

យ៉ាងណាមិញ នៅមិនមានព័ត៌មានលម្អិតអំពីមូលហេតុនៃការបាញ់ប្រហារនេះនៅឡើយទេ។

ទន្ទឹមនឹងនោះ ប្រធានាធិបតីរុស្ស៊ី លោក វ្ល៉ាឌីមៀ ពូទីន នៅថ្ងៃចន្ទនេះ បានថ្កោលទោសការវាយប្រហារនៅទីក្រុង Izhevsk នេះថាជា “ទង្វើអមនុស្សធម៌ដ៏អាក្រក់បំផុត”។

គួរជម្រាបថា Izhevsk គឺជាទីក្រុងមួយដែលមានប្រជាជនប្រហែល 640,000 ដែលមានទីតាំងនៅភាគខាងលិចនៃភ្នំ Ural នៅកណ្តាលប្រទេសរុស្ស៊ី៕