(CNA)៖ តុលាការធម្មនុញ្ញរបស់ប្រទេសថៃគ្រោងនឹងប្រកាសសាលក្រមនៅថ្ងៃសុក្រថ្ងៃទី ៣០ ខែកញ្ញានេះ លើសំណុំរឿងដែលស្វែងរកការកំណត់ថា តើនាយករដ្ឋមន្ត្រី ប្រាយុទ្ធ ចាន់អូចា បានលើសដែនកំណត់រយៈពេល ៨ ឆ្នាំដែលបានកំណត់សម្រាប់តួនាទីរបស់គាត់ឬអត់។
អតីតមេទ័ពថៃ លោក ប្រាយុទ្ធ វ័យ ៦៨ឆ្នាំ ដែលបានដណ្ដើមអំណាចនៅក្នុងរដ្ឋប្រហារឆ្នាំ ២០១៤ មុនពេលក្លាយជានាយករដ្ឋមន្ត្រីជាផ្លូវការភ្លាមៗនោះ ត្រូវបានព្យួរការងារកាលពី ៥ សប្តាហ៍មុន ខណៈដែលតុលាការបានពិភាក្សាលើសំណុំរឿងដែលប្តឹងដោយគណបក្សភឿថៃ ដែលលើកហេតុផលថា គាត់គួរតែចាកចេញពីតំណែងកាលពីខែមុនមកម៉្លេះ។
យ៉ាងណាមិញ តុលាការត្រូវតែសម្រេចថា តើរយៈពេលប្រាំបីឆ្នាំគួរតែរួមបញ្ចូលពេលវេលារបស់ ប្រាយុទ្ធ ជាមេដឹកនាំរបបយោធាដែលគាត់បានដំឡើងបន្ទាប់ពីការផ្តួលរំលំរដ្ឋាភិបាលភឿថៃ។
អ្នកគាំទ្ររបស់គាត់ខ្លះនិយាយថា រយៈពេលប្រាំបីឆ្នាំគួរតែត្រូវបានរាប់បន្ទាប់ពីឆ្នាំ ២០១៧ នៅពេលដែលរដ្ឋធម្មនុញ្ញថ្មីចូលជាធរមាន ឬសូម្បីតែចាប់ពីឆ្នាំ ២០១៩ នៅពេលដែលការបោះឆ្នោតត្រូវបានធ្វើឡើង ហើយសភាថ្មីបានជ្រើសរើសគាត់ឱ្យដឹកនាំរដ្ឋាភិបាលចម្រុះ។
គួរជម្រាបថា បញ្ហាអាណត្តិ គឺជាកិច្ចខិតខំប្រឹងប្រែងមួយក្នុងចំណោមកិច្ចខិតខំប្រឹងប្រែងរបស់បក្សប្រឆាំងជាច្រើន ដើម្បីដកឧត្តមសេនីយ៍ចូលនិវត្តន៍រូបនេះ រួមទាំងការតវ៉ាជាច្រើនខែដែលប្រឆាំងនឹងការដឹកនាំរបស់គាត់ និងរបបរាជានិយម។
យ៉ាងហោចណាស់ ក្រុមប្រឆាំងរដ្ឋាភិបាលចំនួនពីរគ្រោងនឹងប្រមូលផ្តុំនៅសង្កាត់ពាណិជ្ជកម្មកណ្តាលទីក្រុងបាងកកនៅថ្ងៃសុក្រនេះ តុលាការនឹងអានសាលក្រមរបស់ខ្លួន ខណៈដែលប៉ូលិសបាននិយាយថា កម្លាំងសន្តិសុខជាង ៣០០ នាក់នឹងត្រូវដាក់ពង្រាយជុំវិញតុលាការ។
ទោះជាយ៉ាងណា អ្នកនាំពាក្យរដ្ឋាភិបាលលោក Anucha Burapachaisri បានជំរុញឱ្យសាធារណជនគោរពសាលក្រមដែលលោកបាននិយាយថានឹងជម្រះភាពមិនច្បាស់លាស់ណាមួយ ពោលគឺ”លោកនាយករដ្ឋមន្ត្រីបានត្រៀមខ្លួនជាស្រេចក្នុងការទទួលយកសាលក្រមពីតុលាការធម្មនុញ្ញតាមបែបណាក៏ដោយ”៕
