(ALJazeera): អភិបាលតំបន់លោក Pavlo Kyrylenko បាននិយាយថា អាជ្ញាធរអ៊ុយក្រែនបានរកឃើញផ្នូរដ៏ធំមួយនៅក្នុងទីក្រុង Lyman ភាគខាងកើតដែលត្រូវបានរំដោះនាពេលថ្មីៗនេះ ហើយវាមិនច្បាស់ថាតើសាកសពមានចំនួនប៉ុន្មាននោះទេ។
លោក Kyrylenko អភិបាលខេត្ត Donetsk ភាគខាងកើត បានសរសេរនៅលើ Telegram កាលពីថ្ងៃសុក្រថា “ក្រុមមន្ត្រីនៅទីក្រុង Lyman បានរកឃើញ “ផ្នូរដ៏ធំមួយ ដែលយោងទៅតាមព័ត៌មានក្នុងស្រុក អាចមានទាំងទាហាន និងជនស៊ីវិ(ប្រជាជន)។ ប៉ុន្តែ ចំនួនពិតប្រាកដនៅមិនទាន់ត្រូវបានគេដឹងនៅឡើយទេ”។
យោងតាមកាសែត Kyiv Post បានផ្សាយនៅថ្ងៃស្រុកនេះថា ផ្នូរដ៏ធំមួយត្រូវបានរកឃើញនៅ Lyman “កន្លែងដែលសាកសពចំនួន ១៨០នាក់ ត្រូវបានកប់” រួមទាំងកុមារតូចៗផងដែរ។
គួរជម្រាបថា ទាហានអ៊ុយក្រែនបានបើកការវាយលុកយ៉ាងខ្លាំងក្លាដណ្តើមយកទីក្រុង Lyman នៅតំបន់ Donetsk ពីការគ្រប់គ្រងរបស់រុស្ស៊ីមកវិញ កាលពីចុងសប្តាហ៍មុន។
ទោះជាយ៉ាងណា អាជ្ញាធរអ៊ុយក្រែនបានចោទប្រកាន់ទាហានរុស្ស៊ីថា បានប្រព្រឹត្តអំពើដ៏សាហាវឃោរឃៅយ៉ង់ខ្នងក្នុងទឹកដីដែលកាន់កាប់ ប៉ុន្តែរាល់ការចោទប្រកាន់ទីក្រុងម៉ូស្គូតែងតែបដិសេធជានិច្ច។
សូមរំលឹកដែរថា កាលពីខែមុន សាកសពមនុស្ស៤៣៦នាក់ត្រូវបានគេយកចេញពីកន្លែងបញ្ចុះសពក្នុងទីក្រុង Izyum ភាគឦសាន បន្ទាប់ពីវាត្រូវបានរំដោះ។ មន្ត្រីមូលដ្ឋានបាននិយាយថា ភាគច្រើនទំនងជាអ្នកស្លាប់ដោយហិង្សា។
យ៉ាងណាក្តី ការរកឃើញនៅ Izyum បានជំរុញឱ្យសហភាពអឺរ៉ុប បានអំពាវនាវឱ្យមានតុលាការឧក្រិដ្ឋកម្មសង្គ្រាមនៅអ៊ុយក្រែន ហើយតុលាការឧក្រិដ្ឋកម្មអន្តរជាតិ (ICC) បានបញ្ជូនក្រុមអ្នកជំនាញដ៏ធំបំផុតមិនធ្លាប់មានរបស់ខ្លួន ដើម្បីស៊ើបអង្កេតឧក្រិដ្ឋកម្មសង្គ្រាមដែលចោទប្រកាន់ចាប់តាំងពីការចាប់ផ្តើមនៃការឈ្លានពានរបស់រុស្ស៊ីក្នុងខែកុម្ភៈ៕
