មនុស្សបីនាក់បានស្លាប់និងប្រាំបីនាក់ទៀតរងរបួសបន្ទាប់ពីការប៉ះទង្គិចប្រដាប់អាវុធក្នុងសណ្ឋាគារមួយនៅសូម៉ាលី!
ប៉ូលិសបាននិយាយថា យ៉ាងហោចណាស់មនុស្ស 3 នាក់បានស្លាប់ និង 8 នាក់ផ្សេងទៀតបានរងរបួស នៅពេលដែលក្រុមភេរវករ al-Shabaab វាយប្រហារសណ្ឋាគារដ៏ពេញនិយមមួយនៅក្នុងទីក្រុងកំពង់ផែ Kismayo ភាគខាងត្បូងកាលពីថ្ងៃអាទិត្យ នៅប្រទេសសូម៉ាលី។
លោក ម៉ាហាដ អាប់ឌី Mahad Abdi មន្ត្រីប៉ូលីសប្រចាំតំបន់នៅ គីស្មាយ៉ូ Kismayo បាននិយាយថា “ការវាយប្រហារបានចាប់ផ្តើមដោយការគ្រាប់បែក អមដោយការបាញ់កាំភ្លើង បន្ទាប់ពីភេរវករ al-Shabaab បានសម្រុកចូលសណ្ឋាគារ តាវាកាល់ Tawakal ។
ហើយមនុស្សយ៉ាងហោចណាស់បីនាក់ រួមទាំងកុមារសិស្សសាលា ត្រូវបានសម្លាប់នៅក្នុងការផ្ទុះនោះ” ។
លោកបានបន្ថែមថា អ្នករងរបួសដែលភាគច្រើនជាជនស៊ីវិល ត្រូវបានបញ្ជូនទៅកាន់មន្ទីរពេទ្យដើម្បីព្យាបាលផងដែរ។
Tawakal គឺជាសណ្ឋាគារដ៏ពេញនិយមមួយ ដែលតែងតែទៅលេងដោយមន្ត្រីរដ្ឋ និងមន្ត្រីសន្តិសុខរបស់ ជូបាលលែន Jubaland ។
Kismayo គឺជាទីក្រុងដ៏សំខាន់មួយ ដែលជារដ្ឋធានីរដ្ឋបាលរបស់ Jubaland ។ ទីក្រុងកំពង់ផែនេះស្ថិតនៅចម្ងាយ 500 គីឡូម៉ែត្រ (310 ម៉ាយ) ភាគខាងត្បូងនៃរដ្ឋធានី ម៉ុងហ្គាឌីស៊ុ Mogadishu ប្រទេសសូម៉ាលី។
ទោះជាយ៉ាងណា ក្រុមភេរវករ អាល់ ហ្សាបាប al-Shabaab ដែលមានសម្ព័ន្ធភាពជាមួយអាល់កៃដា បានអះអាងទទួលខុសត្រូវចំពោះការវាយប្រហារដ៏សាហាវនេះ ហើយបាននិយាយថា វាមានជាប់ពាក់ព័ន្ធនឹងការបំផ្ទុះគ្រាប់បែកអត្តឃាត មុនពេលក្រុមអ្នកប្រយុទ្ធរបស់ខ្លួនចូលទៅក្នុងសណ្ឋាគារ។
ការវាយប្រហារនេះកើតឡើងខណៈដែលយោធាសូម៉ាលីបន្តការវាយលុករបស់ខ្លួនប្រឆាំងនឹងក្រុមភេរវករនៅក្នុងតំបន់ភាគកណ្តាល ហើយបាននិយាយថាទទួលបានមូលដ្ឋានដ៏សំខាន់ពីក្រុមអាល់សាបាប។
គួរជម្រាបថា សូម៉ាលីបានប្រឈមមុខនឹងការគំរាមកំហែងផ្នែកសន្តិសុខអស់ជាច្រើនឆ្នាំមកហើយ ដោយក្រុម al-Shabaab ជាក្រុមសំខាន់មួយក្នុងប្រទេស។ តាំងពីឆ្នាំ២០០៧មក al-Shabaab បានធ្វើយុទ្ធនាការដ៏សាហាវមួយប្រឆាំងនឹងរដ្ឋាភិបាលសូម៉ាលី និងកងកម្លាំងអន្តរជាតិដែលបានឆក់យកជីវិតមនុស្សរាប់ពាន់នាក់។
យ៉ាងណាមិញ អង្គការសហប្រជាជាតិបានព្រមានអំពីអស្ថិរភាពនៅក្នុងប្រទេសនេះ ដោយរបាយការណ៍តាមកាលកំណត់របស់ខ្លួនស្តីពីប្រទេសសូម៉ាលីនៅឆ្នាំនេះរៀបរាប់លម្អិតអំពីការវាយប្រហារដោយក្រុម al-Shabaab និងក្រុមដែលពាក់ព័ន្ធជាមួយក្រុមភេរវករ Daesh/ISIS ។
គួរបញ្ជាក់ថា យ៉ាងហោចណាស់ជនស៊ីវិល 1,242 នាក់ត្រូវបានសម្លាប់នៅក្នុងការវាយប្រហារភេរវកម្មនៅប្រទេសសូម៉ាលីក្នុងឆ្នាំ 2018-2019 ខណៈដែល 1,735 នាក់បានរងរបួស នេះបើយោងតាមអង្គការសហប្រជាជាតិនៅក្នុងប្រទេសសូម៉ាលី៕
