គណៈរដ្ឋមន្ត្រី អង់គ្លេសចំនួន ១០ រូបលាលែងពីតំណែង ក្រោយនាយករដ្ឋមន្ត្រីថ្មីចូលកាន់អំណាច!
យោងតាមរបាយការណ៍បានឲ្យដឹងថា យ៉ាងហោចណាស់សមាជិក ១០ រូបរបស់រដ្ឋាភិបាលចក្រភពអង់គ្លេសដែលដឹកនាំដោយលោកស្រី លីស ទ្រុស Liz Truss បានលាលែងពីតំណែងភ្លាមៗ បន្ទាប់ពីលោក រីសុី សូណេក Rishi Sunak បានក្លាយជានាយករដ្ឋមន្ត្រីថ្មី។
រដ្ឋមន្ត្រីក្រសួងយុត្តិធម៌ លោក ប្រេឌិន លូវីស Brandon Lewis បាននិយាយនៅលើបណ្ដាញ Twitter នៅពេលប្រកាសលាលែងពីតំណែងថា “ជាកិត្តិយសដែលបានក្លាយជារដ្ឋមន្ត្រីខុទ្ទកាល័យដ៏យូរបំផុតមួយ និងបានបំពេញតួនាទីជារដ្ឋមន្ត្រីចំនួន ៨ នៅក្នុងនាយកដ្ឋានចំនួន ៥ និងក្រោមនាយករដ្ឋមន្រ្តីចំនួន ៤” ។
ក្រៅពីនោះ រដ្ឋលេខាធិការពាណិជ្ជកម្មលោក ជេខូប រីស ម៉ហ្គ Jacob Rees-Mogg, រដ្ឋលេខាធិការអប់រំលោក ខាយដ៍ ម៉ាលថូស Kit Malthouse, រដ្ឋលេខាធិការការងារ និងសោធននិវត្តន៍លោកស្រី ក្លូអេ ស្មីត Chloe Smith, រដ្ឋលេខាធិការបរិស្ថានលោក រ៉ានិល ជេយ៉ាវ៉ាដេណា Ranil Jayawardena ក៏បានប្រកាសលាលែងពីតំណែងផងដែរ ។
ដោយឡែកសមាជិកគណៈរដ្ឋមន្ត្រីចំនួន ៥ នាក់ទៀតដែលលាលែងពីតំណែង រួមមាន រដ្ឋលេខាធិការលោក រូបឺត ប៉ាក្លេន Robert Buckland, ប្រធានគណបក្សលោក ជេក បឺរី Jake Berry, រដ្ឋមន្ត្រីក្រសួងអភិវឌ្ឍន៍ចំណុះការិយាល័យបរទេសលោកស្រី វីហ្គី ហ្វ៊ត Vicky Ford, លោកស្រី វិប វេនឌី មូថុន Whip Wendy Morton និងរដ្ឋលេខាធិការលំនៅដ្ឋានលោក សាយម៉ុន ខ្លាក Simon Clarke ។
គួរបញ្ជាក់ថា កាលពីថ្ងៃចន្ទ លោក Sunak ត្រូវបានជ្រើសរើសជាប្រធានគណបក្សអភិរក្សដែលកំពុងកាន់អំណាច ហើយបានក្លាយនាយករដ្ឋមន្ត្រីថ្មីរបស់អង់គ្លេស ក្រោយការប្រកាសតែងតាំងជាផ្លូវការពីស្ដេច Charles ទី៣ ដោយសារតែមិនមានអ្នកប្រជែងផ្សេងទៀត ៕
