មន្ត្រីស្ថានទូតអាមេរិកទៅសួរសុខទុក្ខកីឡាការនី Brittney Griner នៅក្នុងពន្ធនាគាររុស្ស៊ី!

រដ្ឋបាល Biden បាននិយាយថា មន្ត្រីមកពីស្ថានទូតអាមេរិកនៅទីក្រុងមូស្គូបានជួបជាមួយតារាបាល់បោះអាមេរិក នាង ប្រីតនី ហ្គ្រីន័រ Brittney Griner ដែលកំពុងជាប់ពន្ធនាគារ នឹងបានប្តេជ្ញាថានឹងបន្តរកគ្រប់មធ្យោបាយដើម្បីឲ្យមានការដោះលែងរូបនាង។

ដំណើរទស្សនកិច្ចកាលពីថ្ងៃព្រហស្បតិ៍នេះ គឺជាការចូលទៅកាន់ស្ថានកុងស៊ុលសហរដ្ឋអាមេរិកលើកដំបូងខណៈដែល កីឡាការនី Griner ត្រូវបានកាត់ទោសពីបទប្រើប្រាស់គ្រឿងញៀនសម្រាប់ការនាំយកថង់ទឹករំអិលដែលមានជាតិកញ្ឆាចូលទៅក្នុងប្រទេសរុស្ស៊ី ហើយត្រូវបានកាត់ទោសឱ្យជាប់ពន្ធនាគាររយៈពេលប្រាំបួនឆ្នាំ។

អ្នកនាំពាក្យក្រសួងការបរទេសសហរដ្ឋអាមេរិកលោក ណេត ប្រាយ Ned Price បានសរសេរនៅលើ Twitter កាលពីថ្ងៃព្រហស្បតិ៍ថា មន្ត្រីសហរដ្ឋអាមេរិកក្នុងអំឡុងពេលកិច្ចប្រជុំបានឃើញវីរភាព “ភាពអត់ធ្មត់ និងការតស៊ូរបស់នាង Griner”។

គួរជម្រាបថា កីឡាការនី Brittney Griner ដែលជាម្ចាស់មេដាយមាសអូឡាំពិកពីរសម័យកាល គឺជាពលរដ្ឋអាមេរិកម្នាក់ក្នុងចំណោមពលរដ្ឋអាមេរិកពីរនាក់ដែលក្រុងវ៉ាស៊ីនតោននិយាយថាជាប់គុកដោយអយុត្តិធម៌នៅក្នុងប្រទេសរុស្ស៊ី។ ជាមួយនឹង លោក Paul Whelan ជាអតីតទាហានជើងទឹកអាមេរិក ត្រូវបានកាត់ទោសឱ្យជាប់គុក 16 ឆ្នាំក្នុងឆ្នាំ 2020 ពីបទចារកម្ម។

ការចាប់ខ្លួននាង Griner នៅដើមឆ្នាំនេះបានកើតឡើងប៉ុន្មានថ្ងៃមុនពេលដែលរុស្ស៊ីចាប់ផ្តើមការលុកលុយយ៉ាងពេញទំហឹងលើអ៊ុយក្រែន ហើយសំណុំរឿងរបស់នាងបានផ្លាស់ប្តូរតាមរយៈប្រព័ន្ធតុលាការរុស្ស៊ីចំពេលទំនាក់ទំនងដែលបែកបាក់រវាងទីក្រុងមូស្គូ និងវ៉ាស៊ីនតោនជុំវិញសង្គ្រាម៕