ចិន និងរុស្ស៊ី ប៉ះសម្តីគ្នាមួយប្រាវជាមួយអាមេរិកនៅ UN ជុំវិញការបាញ់មីស៊ីលរបស់កូរ៉េខាងជើង!

សហរដ្ឋអាមេរិក និងសម្ព័ន្ធមិត្តបានប៉ះទង្គិចសម្តីគ្នាយ៉ាងតឹងសសៃករ ជាមួយប្រទេសចិន និងរុស្ស៊ី ដោយចោទប្រកាន់ប្រទេសទាំងពីរថា មិនបានរារាំងសកម្មភាពឬចាត់វិធានការប្រឆាំងនឹងកូរ៉េខាងជើងសម្រាប់ការបាញ់មីស៊ីលផ្លោងកាន់តែកើនឡើងៗ។

សមាជិកទាំង ១៥ នៃក្រុមប្រឹក្សាសន្តិសុខ UN បានបរាជ័យកាលពីថ្ងៃសុក្រក្នុងការយល់ព្រមលើសេចក្តីថ្លែងការណ៍រួមមួយដោយថ្កោលទោសចំពោះការរារាំងថ្មីៗនេះនៃមីស៊ីលផ្លោងពីកូរ៉េខាងជើង។  ផ្ទុយទៅវិញ ប្រទេសមួយចំនួន រួមទាំងបារាំង ចក្រភពអង់គ្លេស និងសហរដ្ឋអាមេរិក បានថ្កោលទោសដោយឡែកពីគ្នា ចំពោះការធ្វើតេស្តមីស៊ីលដែលកំពុងបន្តរបស់ទីក្រុងព្យុងយ៉ាង។

ប្រទេសកូរ៉េខាងជើង បានធ្វើការបាញ់បង្ហោះកាំជ្រួចជាច្រើនក្នុងសប្តាហ៍នេះ រួមទាំងកាំជ្រួចមីស៊ីលឆ្លងទ្វីប (ICBM) ដែលនាំឱ្យចំនួនមីស៊ីលសរុបដែលបានបាញ់ឡើងដល់ជាង 60 គ្រាប់គិតមកដល់ពេលនេះ។

ក្នុងនោះ ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោកស្រី លីនដា ថូម៉ាស់ ហ្គ្រីនហ្វៀល Linda Thomas-Greenfield បាននិយាយថា” សមាជិកក្រុមប្រឹក្សាសន្តិសុខ 13 ក្នុងចំណោម 15 បានថ្កោលទោសចំពោះការបាញ់មីស៊ីលផ្លោងរបស់កូរ៉េខាងជើង ប៉ុន្តែ មានតែប្រទេសពីរប៉ុណ្ណោះ គឺ ចិន និងរុស្ស៊ី ដែលមិនអើពើ”។  

ប៉ុន្តែចិន ដែលជាសម្ព័ន្ធមិត្តជិតស្និទ្ធបំផុតរបស់កូរ៉េខាងជើង និងរុស្ស៊ី ហើយស្របពេលដែលកំពុងមានទំនាក់ទំនងជាមួយលោកខាងលិចកាន់តែយ៉ាប់យ៉ឺនផងនោះ បានប្រាប់កិច្ចប្រជុំអង្គការសហប្រជាជាតិថា សហរដ្ឋអាមេរិកត្រូវស្តីបន្ទោសចំពោះភាពតានតឹងដែលកំពុងបន្តជាមួយកូរ៉េខាងជើងខ្លួនឯង។

ឯកអគ្គរដ្ឋទូតអង្គការសហប្រជាជាតិរបស់ប្រទេសចិន លោក ចាង ជុន Zhang Jun បានប្រឆាំងថា” ការបាញ់កាំជ្រួចរបស់កូរ៉េខាងជើង គឺជាឆ្លើយតបទៅនឹងការចាប់ផ្តើមឡើងវិញនូវសមយុទ្ធយោធាទ្រង់ទ្រាយធំរបស់សហរដ្ឋអាមេរិក និងកូរ៉េខាងត្បូង បន្ទាប់ពីសម្រាករយៈពេលប្រាំឆ្នាំ រួមទាំងសមយុទ្ធទ័ពអាកាសដែលពាក់ព័ន្ធនឹងយន្តហោះចម្បាំងរាប់រយគ្រឿងមកពីប្រទេសទាំងពីរ។

ឯកអគ្គរដ្ឋទូតចិនរូបនេះក៏បានចង្អុលទៅក្រសួងការពារជាតិអាមេរិក ដែលលោកបាននិយាយថា ការគិតគូរពីការប្រើប្រាស់អាវុធនុយក្លេអ៊ែររបស់ប្រទេសកូរ៉េខាងជើង និងការដួលរលំនៃរបបនៅទីក្រុងព្យុងយ៉ាងគឺជាគោលដៅចម្បងមួយរបស់សហរដ្ឋអាមេរិក។

ឯកអគ្គរដ្ឋទូតរងអង្គការសហប្រជាជាតិរបស់រុស្ស៊ីលោកស្រី អាណា អ៊ីវស្ទីងីវ៉ា  Anna Evstigneeva បានស្តីបន្ទោសស្ថានការណ៍កាន់តែអាក្រក់ទៅៗនៅឧបទ្វីបកូរ៉េ នៅពេលនេះ គឺជាបំណងប្រាថ្នារបស់ទីក្រុងវ៉ាស៊ីនតោន ដើម្បីបង្ខំឱ្យទីក្រុងព្យុងយ៉ាងរំសាយអាវុធជាឯកតោភាគី ដោយប្រើទណ្ឌកម្ម និងការដាក់សម្ពាធ និងកម្លាំង។

លោកស្រីបានហៅការធ្វើសមយុទ្ធយោធាផ្លូវអាកាសរវាងសហរដ្ឋអាមេរិក និងកូរ៉េខាងត្បូង ដែលបានចាប់ផ្តើមនៅថ្ងៃទី ៣១ ខែតុលា ដែលមានទំហំមិនធ្លាប់មានពីមុនមក ជាមួយនឹងយន្តហោះយោធាប្រហែល ២៤០ គ្រឿង ហើយបានអះអាងថា ពួកគេគឺជា “ការហាត់សមដ៏សំខាន់សម្រាប់ធ្វើការវាយប្រហារទ្រង់ទ្រាយធំលើទឹកដីកូរ៉េខាងជើង” ។

ទោះជាយ៉ាងណា កូរ៉េខាងជើងបានអះអាងថា ការពារកម្មវិធីអាវុធរបស់ខ្លួន និងការបាញ់មីស៊ីលផ្លោងរបស់ខ្លួនថាជាមធ្យោបាយការពារស្របច្បាប់ប្រឆាំងនឹងអ្វីដែលខ្លួនមើលឃើញថាជាការគំរាមកំហែងដែលមានអាយុកាលរាប់ទសវត្សរ៍ពីសហរដ្ឋអាមេរិក និងសម្ព័ន្ធមិត្តកូរ៉េខាងត្បូង៕