រុស្ស៊ីបដិសេធចំពោះព័ត៌មានថា លោក Lavrov ឈឺចូលមន្ទីរពេទ្យ ខកខានក្នុងកិច្ចប្រជុំកំពូល G-20 នៅកោះបាលី!
ប្រទេសរុស្ស៊ីកាលពីថ្ងៃចន្ទបានបដិសេធរបាយការណ៍ពីសារព័ត៌មានអន្តរជាតិ ដែលអះអាងថា រដ្ឋមន្ត្រីការបរទេស លោក Sergey Lavrov ត្រូវបានបញ្ជូនទៅមន្ទីរពេទ្យសង្គ្រោះបន្ទាន់ នៅមុនកិច្ចប្រជុំកំពូល G-20 នៅទីក្រុងបាលីប្រទេសឥណ្ឌូនេស៊ី។
អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បាននិយាយតាម Telegram ថា
“Sergey Viktorovich និងខ្ញុំកំពុងអានកាសែតនៅទីនេះនៅប្រទេសឥណ្ឌូនេស៊ី ហើយយើងមិនជឿភ្នែករបស់យើងទេ៖ វាប្រែថាគាត់ត្រូវបានបញ្ជូនទៅមន្ទីរពេទ្យ។ នេះសរបញ្ជាក់ឲ្យឃើញថា វាជាព័ត៌មានការក្លែងក្លាយ”។
ក្រោយមក លោកស្រី Zakharova បានបង្ហោះវីដេអូរបស់លោក Lavrov ឆ្លើយតបនឹងរបាយការណ៍ថាគាត់កំពុងសម្រាកនៅមន្ទីរពេទ្យ។
លោក Lavrov បាននិយាយក្នុងវីដេអូថា «អស់រយៈពេលប្រហែលដប់ឆ្នាំមកហើយ ដែលពួកគេបានសរសេរអំពីប្រធានាធិបតីរបស់យើងថាគាត់មានជំងឺ។ តើនេះវាជាការPrank ឬជារឿងថ្មីក្នុងរឿងនយោបាយរបស់ពួកលោកខាងលិច?»។ “ដើម្បីឱ្យមានភាពស្មោះត្រង់ជាងមុន សូមកាសែតលោកខាងលិចមេត្តាសរសេរការពិត នៅក្នុងរបាយការណ៍របស់ពួកគេ មិនកំណត់របាយការណ៍ដោយទស្សនៈតែមួយនោះទេ” ។
គួរជម្រាបថា ទីភ្នាក់ងារសារព័ត៌មាន Associated Press (AP) ដែលដកស្រង់សម្តីមន្ត្រីឥណ្ឌូនេស៊ីបាននិយាយកាលពីថ្ងៃចន្ទថា លោក Lavrov វ័យ72ឆ្នាំ ត្រូវបានបញ្ជូនទៅមន្ទីរពេទ្យភ្លាមៗ ដោយជម្ងឺគាំងបេះដូង បន្ទាប់ពីបានមកដល់កោះបាលីសម្រាប់កិច្ចប្រជុំកំពូលក្រុមចំនួន 20 ។
យ៉ាងណាមិញ អភិបាលខេត្តបាលី លោក Wayan Koster បានប្រាប់ទីភ្នាក់ងារព័ត៌មាន Reuters ថា លោក Lavrov បានទៅពិនិត្យសុខភាពនៅមន្ទីរពេទ្យ ហើយថាលោកមានសុខភាពល្អណាស់៕
