លោក Elon Musk ចាប់ផ្តើមការស្ទង់មតិអ្នកលេង Twitter លើការស្ដារគណនីរបស់លោក Trump ឡើងវិញ!
ម្ចាស់ថ្មីរបស់ Twitter លោក អេលុន ម៉ាស់ Elon Musk បានចាប់ផ្តើមធ្វើការស្ទង់មតិ កាលពីថ្ងៃសុក្រលើក្រុមហ៊ុនប្រព័ន្ធផ្សព្វផ្សាយសង្គមយក្សមួយនេះ ដែលសួរថា តើអតីតប្រធានាធិបតីអាមេរិក ដូណាល់ ត្រាំ Donald Trump គួរតែត្រូវបានអនុញ្ញាតឱ្យត្រឡប់មកវិញនៅលើវេទិកាដែរឬទេ។
លោក Musk បានសរសេរនៅក្នុងការបង្ហោះដែលទទួលបានការចាប់អារម្មណ៍ជាង ៤,៤ លានដងនៅពេលបោះពុម្ពផ្សាយថា “ដាក់អតីតប្រធានាធិបតី Trump ឡើងវិញ”។
អ្នកប្រើប្រាស់ច្រើនជាង ៥៥% បានបោះឆ្នោតថា “Yes” ខណៈពេលដែល ៤៤% បាននិយាយថា “No” ។
ប៉ុន្មានម៉ោងមុននេះ មហាសេដ្ឋីអាមេរិករូបនេះបានបង្កប់ន័យថាគាត់កំពុងគិតថាតើត្រូវដាក់គណនី Twitter របស់លោក Trump ឡើងវិញឬអត់។
លោក Musk បានសរសេរនៅលើ Twitter ថា “ការសម្រេចចិត្តរបស់ Trump មិនទាន់ត្រូវបានធ្វើឡើងទេ” ខណៈដែលគាត់បានប្រកាសពីការស្តារគណនីកម្រិតខ្ពស់ចំនួនបីដែលត្រូវបានហាមឃាត់ដោយប្រព័ន្ធផ្សព្វផ្សាយសង្គមយក្សមួយនេះ។
លោក Musk បាននិយាយថា គណនី Twitterដូចជា៖ “Kathie Griffin, Jorden Peterson & Babylon Bee ត្រូវបានស្តារឡើងវិញ” ។
គួរជម្រាបថាគណនីរបស់អតីតប្រធានាធិបតីអាមេរិកលោក Trump មានអ្នកតាមដានប្រហែល ៨៨.៨ លាននាក់ នៅពេលដែល Twitter បានផ្អាកជាអចិន្ត្រៃយ៍គណនីរបស់អតីតប្រធានាធិបតីអាមេរិកក្នុងខែមករា ឆ្នាំ ២០២១ ដោយលើកឡើងពីតួនាទីរបស់គាត់នៅក្នុងកុបកម្មថ្ងៃទី ៦ ខែមករា នៅវិមាន Capitol របស់សហរដ្ឋអាមេរិក និងសក្តានុពលនៃអំពើហិង្សាបន្ថែមទៀត។
យ៉ាងណាមិញ លោក Musk បានព្យាករណ៍ពីការវិលត្រឡប់របស់លោក Trump នៅក្នុងខែឧសភា នៅពេលដែលគាត់បានហៅការបណ្តេញចេញនេះថា “ខុសសីលធម៌ និងល្ងង់ខ្លៅបំផុត”៕
