មីយ៉ាន់ម៉ា មិនត្រូវបានអញ្ជើញឲ្យចូលរួមកិច្ចប្រជុំប្រមុខការពារជាតិអាស៊ាននៅកម្ពុជាឡើយ!
កិច្ចប្រជុំនេះនឹងធ្វើឡើងនៅថ្ងៃពុធ ទី២៣ ខែវិច្ឆិកា នៅខេត្តសៀមរាប ខណៈរដ្ឋមន្ត្រីការពារជាតិអាមេរិក លោក Lloyd Austin និងសមភាគីចិន លោក Wei Fenghe ក៏នឹងចូលរួមផងដែរ ។
ទន្ទឹមនោះ ប្រភពការទូតអាស៊ានបាននិយាយថា អ្នកចូលរួមមួយចំនួនមានការស្ទាក់ស្ទើរយ៉ាងខ្លាំងក្នុងការអង្គុយជាមួយតំណាងយោធាមីយ៉ាន់ម៉ា ដោយសារតែប្រទេសនេះមានភាពចលាចល ចាប់តាំងពីរដ្ឋប្រហារកាលពីឆ្នាំមុន ហើយយោធានៅតែបន្តវាយប្រហារលើកងកម្លាំងគាំទ្រលទ្ធិប្រជាធិបតេយ្យ ។
ស្របពេលជាមួយគ្នានេះ មេដឹកនាំអាស៊ានក៏បានព្រមព្រៀងគ្នានៅក្នុងកិច្ចប្រជុំកំពូលលើកទី៤០ និងទី៤១ កាលពីដើមខែនេះ ដើម្បីពិនិត្យឡើងវិញនូវតំណាងរបស់មីយ៉ាន់ម៉ានៅគ្រប់កម្រិតនៃកិច្ចជុំរបស់ខ្លួនផងដែរ ខណៈកន្លងមកសមាជិកនៃយោធាមីយ៉ាន់ម៉ា ត្រូវបានរារាំងរួចទៅហើយពីកិច្ចប្រជុំកំពូលអាស៊ាន និងកិច្ចប្រជុំរដ្ឋមន្ត្រីការបរទេស ៕
