ក្តៅៗ មុននេះបន្តិច រុស្ស៊ីបាញ់បានមីសុីលជាង៧០គ្រាប់មកលើអ៊ុយក្រែនដោយអះអាងថាជាការសងសឹក!
អ៊ុយក្រែនបានអះអាងថា រុស្ស៊ីបានបំផ្លាញផ្ទះសំបែងជនសុីវិលនៅភាគអាគ្នេយ៍ និងផ្តាច់ថាមពលនៅក្នុងតំបន់ជាច្រើនជាមួយនឹងកាំជ្រួចផ្លោងសារជាថ្មីកាលពីថ្ងៃចន្ទ ខណៈដែលទីក្រុងម៉ូស្គូបាននិយាយថា ជាការសងសឹកចំពោះយន្តហោះគ្មានមនុស្សបើករបស់អ៊ុយក្រែនបានវាយប្រហារមូលដ្ឋានទ័ពអាកាសក្នុងប្រទេសរុស្ស៊ីដែលមានចម្ងាយរាប់រយគីឡូម៉ែត្រពីជួរមុខ។
កងកម្លាំងអាកាសរបស់អ៊ុយក្រែនបាននិយាយថា ខ្លួនបានបាញ់ទម្លាក់កាំជ្រួចមីសុីលជាង ៦០ ក្នុងចំណោមជាង ៧០ គ្រាប់ដែលត្រូវបានបាញ់ដោយរុស្ស៊ីនៅថ្ងៃចន្ទនេះ(ម៉ោងនៅអ៊ុយក្រែន) ដែលជាការវាយប្រហារចុងក្រោយបំផុតក្នុងសប្តាហ៍នៃការវាយប្រហារសំដៅលើហេដ្ឋារចនាសម្ព័ន្ធសំខាន់ៗរបស់ខ្លួនដែលបានកាត់ផ្តាច់ថាមពល កំដៅ និងទឹកទៅកាន់ផ្នែកជាច្រើននៃប្រទេស។
ក្រសួងការពារជាតិរុស្ស៊ីបាននិយាយថា យន្តហោះគ្មានមនុស្សបើករបស់អ៊ុយក្រែន បានវាយប្រហារមូលដ្ឋានទ័ពអាកាសចំនួនពីរនៅ Ryazan និង Saratov នៅភាគនិរតីនៃប្រទេសរុស្ស៊ី ដោយបានសម្លាប់ទាហាន ៣ នាក់ និងរងរបួស ៤ នាក់ ជាមួយនឹងយន្តហោះពីរគ្រឿងដែលរងការខូចខាតដោយបំណែកនៃយន្តហោះគ្មានមនុស្សបើកនៅពេលពួកគេត្រូវបានបាញ់ទម្លាក់។
ទោះជាយ៉ាងណា អ៊ុយក្រែនមិនបានអះអាងទទួលខុសត្រូវដោយផ្ទាល់ចំពោះការវាយប្រហារនេះទេ។ ប្រសិនបើវាជាការពិត នោះពួកគេនឹងក្លាយជាការវាយប្រហារដ៏ជ្រៅបំផុតនៅក្នុងបេះដូងរុស្ស៊ី ចាប់តាំងពីទីក្រុងមូស្គូបានឈ្លានពានអ៊ុយក្រែននៅថ្ងៃទី 24 ខែកុម្ភៈ៕
