សហរដ្ឋអាមេរិកកំពុងរៀបចំផែនការចុងក្រោយក្នុងការបញ្ជូនប្រព័ន្ធការពារដែនអាកាស Patriot ដ៏ទំនើបរបស់ខ្លួនទៅកាន់ប្រទេសអ៊ុយក្រែន បន្ទាប់ពីការស្នើសុំជាបន្ទាន់ពីទីក្រុង Kyiv ដែលចង់បានអាវុធដ៏រឹងមាំបន្ថែមទៀត ដើម្បីបាញ់ទម្លាក់មីស៊ីល និងយន្តហោះគ្មានមនុស្សបើករបស់រុស្ស៊ី ដែលបានបំផ្លិចបំផ្លាញហេដ្ឋារចនាសម្ព័ន្ធថាមពលរបស់ប្រទេស ហើយបានបន្សល់ទុកមនុស្សរាប់លាននាក់ដោយគ្មានកំដៅក្នុងភាពជូរចត់ត្រជាក់នៃរដូវរងា។
នេះបើយោងតាមទីភ្នាក់ងារព័ត៌មាន Reuters និង Associated Press បានរាយការណ៍កាលពីថ្ងៃអង្គារ ដោយដកស្រង់សម្តីមន្ត្រីរដ្ឋាភិបាលសហរដ្ឋអាមេរិក។
ប្រធានាធិបតីអ៊ុយក្រែន លោក Volodymyr Zelenskyy បានដាក់សម្ពាធលើមេដឹកនាំលោកខាងលិចកាលពីថ្ងៃចន្ទ ដើម្បីផ្តល់អាវុធទំនើបៗបន្ថែមទៀតដល់អ៊ុយក្រែន។ ជាពិសេស Patriot នឹងក្លាយជាប្រព័ន្ធមីស៊ីលពីដីទៅអាកាសដ៏ទំនើបបំផុត ដែលលោកខាងលិចបានផ្តល់ឲ្យអ៊ុយក្រែន។
ទោះជាយ៉ាងណា អតីតប្រធានាធិបតីរុស្ស៊ី លោក Dmitry Medvedev បានព្រមានអង្គការណាតូប្រឆាំងនឹងការបំពាក់ទីក្រុង Kyiv ជាមួយនឹងការការពារកាំជ្រួច Patriot ហើយវាទំនងជាវិមានក្រឹមឡាំងនឹងចាត់ទុកវិធានការនេះជាការកើនឡើង។
គួរជម្រាបថា សហរដ្ឋអាមេរិកបានផ្តល់ជំនួយយោធាចំនួន 19.3 ពាន់លានដុល្លារដល់អ៊ុយក្រែនចាប់តាំងពីការឈ្លានពានមក ដែលជាជម្លោះដ៏ធំបំផុតរបស់អឺរ៉ុបចាប់តាំងពីសង្គ្រាមលោកលើកទីពីរមក៕
