ប្រធានាធិបតី វ្ល៉ាឌីមៀ ពូទីន និយាយថា ការវាយលុករបស់រុស្ស៊ីនៅអ៊ុយក្រែនកំពុងត្រូវបានអនុវត្តដើម្បី “បង្រួបបង្រួមប្រជាជនរុស្ស៊ីតែមួយ” ។
លោកពូទីនបាននិយាយបែបនេះនៅក្នុងបទសម្ភាសន៍មួយដែលត្រូវចាក់ផ្សាយកាលពីថ្ងៃអាទិត្យថា អ៊ុយក្រែន និងរុស្ស៊ីគឺជាប្រជាជនតែមួយ ខណៈដែលគាត់ព្យាយាមបង្ហាញអំពីភាពត្រឹមត្រូវនៃការវាយលុករយៈពេល 10 ខែរបស់គាត់នៅក្នុងប្រទេសអ៊ុយក្រែន និងធ្វើឱ្យខូចដល់អធិបតេយ្យភាពរបស់អ៊ុយក្រែន។
លោកពូទីនបាននិយាយនៅក្នុងការដកស្រង់ចេញពីការផ្សាយសម្រាប់ទូរទស្សន៍ជាតិ Rossiya 1 ថា “គូប្រជែងភូមិសាស្ត្រនយោបាយរបស់រុស្ស៊ី គឺ មានគោលបំណងដើម្បីបំបែកបំបាក់ប្រទេសរុស្ស៊ីដែលជាប្រវត្តិសាស្ត្ររុស្ស៊ី” ។
ទោះជាយ៉ាងណា លោក ពូទីន ធ្លាប់បាននិយាយម្តងហើយម្តងទៀតថា ទីក្រុងម៉ូស្គូបានត្រៀមខ្លួនជាស្រេចដើម្បីចរចា ប៉ុន្តែលោកបាននិយាយថា អ៊ុយក្រែន និងសម្ព័ន្ធមិត្តលោកខាងលិចបានបដិសេធមិនធ្វើកិច្ចចរចានោះឡើយ។
គួរជម្រាបថា នៅភាគខាងត្បូងប្រទេសអ៊ុយក្រែន ចំនួនអ្នកស្លាប់ដោយសារការវាយប្រហាររបស់រុស្ស៊ីលើទីក្រុង Kherson បានកើនឡើងដល់ 16 នាក់ និងមនុស្សចំនួន 64 នាក់បានរងរបួស នេះបើតាមអភិបាលយោធាអ៊ុយក្រែនប្រចាំតំបន់បានរាយការណ៍កាលពីថ្ងៃអាទិត្យ ខណៈដែលសំឡេងស៊ីរ៉ែនវាយប្រហារតាមអាកាសបានបន្លឺឡើងនៅទូទាំងប្រទេសនៅថ្ងៃបុណ្យណូអែល៕
